Quirós llamenta la campaña informativa de los mélicos escontra la so reforma y pide collaboración pa "meyorar la sanidá"

"El conseyeru de Salú y Servicios Sanitarios, Ramón Quirós, calificó güei de ""llamentable"" y basada en ""opiniones"" la campaña informativa entamada ayeri polos mélicos nos centros de salú urbanos escontra la so reforma pa l'Atención Primaria, polo que calcó nel so pidimientu de collaboración de los profesionales pa ""meyorar la sanidá"" nel Principáu.

Asina lo apuntó en declaraciones a los medios enantes de participar nel actu d'inauguración de la nueva sede de l'Asociación Parkinson Asturies, n'Uviéu.

Ante l'argumentu de la plataforma mélica contraria a la reforma, na que participa activamente'l Sindicatu Mélicu (Simpa), de qu'ésta ""va perxudicar"" a los pacientes, el conseyeru calcó en que ""se trata d'una opinión"", polo que pidió que se llenden a ""los fechos"".

""Ye llamentable, cuando tenemos problemes importantes enriba la mesa y tamos tentando de meyorar les esperes y que los profesionales dispongan de más tiempu p'atender a los pacientes"", destacó.

De la mesma manera, el conseyeru afirmó que ""hai que centrar los esfuerzos en trabayar conxuntamente porque d'otra manera nun vamos llograr naide nada"". ""Hai que dir a por polítiques nes que toos ganemos, tanto los profesionales como la ciudadanía"", dixo.

D'esta manera, Quirós recordó que l'Executivu asturianu manifestó la so voluntá ""de trabayar cola sociedá y los profesionales p'algamar unos servicios sanitarios de calidá pa toos"". ""Hai coses que claramente hai que meyorar, y nesi camín mos metimos"", añadió.

Poro, fizo un llamáu a los profesionales que quieren meyorar ""la sanidá"" a que trabayen ""conxuntamente col Gobiernu"", porque ""realmente lo que se pretende ye meyorar el serviciu sanitariu públicu y l'Atención Primaria ye un elementu esencial sobre'l que xestionar cualquier exerciciu de cambiu"". ""Merez la pena que mos pongamos a trabayar de manera conxunta"", calcó."