Rajoy venceya una meyora de les pensiones al aprobamientu de los Presupuestos

El presidente del Gobiernu estatal compareció esti miércoles nel Congresu pa falar sobre la garantía de les pensiones. Na so intervención, Mariano Rajoy venceyó una meyora de les mínimes y de les de vilbedá al aprobamientu de los Presupuestos Xenerales.

El líder popular considera “razonable” elevar les pensiones mínimes nel 2018 na mesma cantidá que l’Índiz de Precios de Consumu (IPC) pero pidió “responsabilidá” al restu de fuercies polítiques pa sacar alantre les cuentes que va presentar el día 23. D’esta forma, Rajoy trata de presionar a la oposición nun asuntu que ta d’actualidá na cai, con movilizaciones de la ciudadanía.

Amás d’estes dos propuestes, tamién confirmó la so intención de concentrar les ayudes fiscales nel IRPF pa pensionistes y families, anuncia fecha pol ministru de Facienda y Alministraciones Públiques, Cristóbal Montoro, hai dos selmanes. Anguaño, les pensiones xuben un 0,25 por cientu añal, mui perbaxo del IPC, que zarró 2017 con una medra del 1,2 por cientu.

Manifestación el sábadu en Xixón

Dellos coleutivos convoquen pa esti sábadu en Xixón una manifestación pa reclamar pensiones dignes. Ésta va salir a les 12 hores de la plaza de toros d’El Bibio pa percorrer tola carretera la Costa y finar en Begoña.