Echa a andar la Rede pola Oficialidá de la Contorna d'Avilés (ROCA)

Celebra la so presentación pública con un actu con representantes de l'ALLA y de los coleutivos de defensa del idioma.

El 3 de febreru constituyóse de manera oficial la Rede pola Oficialidá de la Contorna d'Avilés (ROCA), coleutivu que naz col oxetivu de "da-y impulsu nesta contorna al procesu puestu en marcha haza la oficialidá de la llingua asturiana". Esta tarde fai la so presentación pública con un actu nel que se van a esponer los oxetivos colos que naz, amás de "analizar les llinies xenerales del modelu d’oficialidá afayadizu p’Asturies, el procesu que tien de ponese en marcha pal algame de dicha oficialidá y el papel que tien de xugar el movimientu social de reivindicación nesti procesu".

La ROCA va tar sofitada nesti eventu inaugural pola Academia de la Llingua Asturiana (ALLA), la Xunta pola Defensa de la Llingua Asturiana y Iniciativa pol Asturianu, que van tar representaos pol secretariu Xosé Ramón Iglesias Cueva, Xosé Candel y Sabel Tuñón, de manera respeutiva. Alexia Fernández va ser la encargada de falar por parte del coleutivu nuevu nun actu que va comenzar a les 19.30 hores nel Centru de Servicios Universitarios (La Ferrería 7, Avilés), y que va zarrar un grupu de pandereteres de l'Asociación Cultural Escontra'l Raigañu.