L'alcalde d'Uviéu acusa a la ministra de Vivienda de face-y perder el tiempu a costa del dineru de los uvieínos

"L'alcalde d'Uviéu, Gabino de Lorenzo (PP), unvió ayeri a última hora una carta a la Ministra de Vivienda, Beatriz Corredor, na que-y reprocha qu'ayeri lu tratare como un ""convidáu de piedra"" na firma d'unos convenios en Madrid relativos a proyeutos qu'afeuten a la ciudá. ""Ficiéronme perder el tiempu a costa del dineru de tolos uvieínos, pero-y aseguro que nun voi permitir que dalgo asina se repita"", diz De Lorenzo na comunicación dirixida a la ministra, según informaron fontes del Conceyu.

De Lorenzo facía asina alusión al actu que tuvo llugar en Madrid nel que se firmaron acuerdos col Ministeriu de Vivienda que van suponer la construcción de 1.900 nueves viviendes ente Uviéu y Parres. Tres proyeutos correspuenden a Uviéu: les árees d'urbanización prioritaria 'La Malata Norte', 'San Claudio La Cruz Santa' y 'San Claudio El Payán Fase 2'. De Lorenzo, que se sentó na fila d'autoridaes, llegó hasta a abandonar l'actu enantes d'acabar.

Na carta, l'alclade d'Uviéu dixo que foi a Madrid dempués de que'l Gabinete del Ministeriu lu convocare pa la firma del conveniu de financiación de dellos ámbitos de vivienda protexida n'Uviéu. Una vez en Madrid, De Lorenzo, dixo qu'acoyó con ""sorpresa"" el tratamientu que se-y dio, como un ""simple convidáu de piedra"", dalgo que tachó de ""intolerable"".

""De los sos compañeros del Principáu nada me sorprende yá, pero qu'un miembru del Gobiernu d'España se preste a estos xuegos resulta, francamente, inaceptable"", añadió na carta dirixida a la ministra. ""Esti tipu de xestos mezquinos nun son propios d'una institución seria"", sentenció l'alcalde.

En tou casu y, según espunxo'l primer edil na mencionada carta, executar un Plan de Vivienda exixe ""dalgo más que facese una semeya"". Asina, aprovechó pa reclamar la ""resolución darréu"" de ""problemes estructurales"", como la conexón de l'Autovía con San Claudio o la meyora de la rede de saniamientu. ""Habrán ser les inversiones estatales y autonómiques les que dean respuesta a dambos problemes"", acabó."