L'ETLEN preséntase en Santiago de Compostela

Ramón d'Andrés y Xosé Miguel Suárez Fernández ‘Tapia’ van falar en Galicia sobre esti completu atles llingüísticu obra del Seminariu de Filoloxía Asturiana (SFA).

El 'Estudiu de la Transición Llingüística na Zona Eo-Navia (ETLEN)' preséntase en Galicia depués de que Ramón d'Andrés esplicara'l so métodu y los sos resultaos principales n'Uviéu y Xixón. L'Instituto da Lingua Galega convida al coordinador del SFA y direutor del proyeutu nun actu que va tener llugar mañana, a les 13 hores, nel salón de graos de la Facultade de Filoloxía de la Universidade de Santiago de Compostela, eventu nel que tamién van tar presentes Tapia, miembru del equipu investigador, y Rosario Álvarez, caderalga de l'área Filoloxías Galega e Portuguesa y ayalguera del centru d'investigación gallegu.

Esti importante trabayu sobre la frontera llingüística ente'l gallegoportugués y l’asturlleonés, na parte más occidental d'Asturies, ye'l resultáu d'un llabor de 17 años con 108 encuentes realizaes d'una duración d’ente 5 y 12 hores caúna con 531 entrugues sobre fenómenos llingüísticos. En total, 240 hores de grabación dixital que tienen como resultáu final un atles llingüísticu de 1.088 páxines con 643 mapes a too color, de los que 531 son dialectográficos y 112 estadísticos, nos que queden reflexaos tolos datos recoyíos.

Xunto a D'Andrés y Tapia, firmen l'ETLEN los llingüistes Fernando Álvarez-Balbuena y Miguel R. Monteavaro, anque detrás tamién ta un ampliu grupu de collaboradores que permitieron dar forma a esti estudiu. Trabe encargóse de la edición del atles llingüísticu.