Manuel de la Cera solicita que se dea prioridá a los Centros Asturianos sobre les asociaciones na Llei d'Asturianía

"El presidente del Conseyu de Comunidaes Asturianes, Manuel de la Cera, pidió güei que la futura Llei d'Asturianía dea prioridá a los Centros Asturianos nel esterior penriba de les nueves asociaciones d'inmigrantes de la comunidá que tán surdiendo en diferentes zonas del mundu, tales como Asma (Asturianos en Madrid), Aslon (Asturianos en Londres) o Asbru (Asturianos en Bruseles).

De la Cera espresóse nesti sen demientres la so declaración na Comisión de Presidencia, Xusticia y Igualdá de la Xunta Xeneral del Principáu, per onde dende'l vienres vienen pasando distintes persones p'aldericar sobre la futura llei d'Asturianía, frutu d'una proposición de llei d'IX, que contó col respaldu del PP.

De la Cera señaló esta cuestión, dempués de que se refiriere a ella la conseyera de la Presidencia, Xusticia y Igualdá, María José Ramos, que ve aspeutos ""problemáticos y preocupantes"" nel proyeutu. Referíase ente otres coses a la necesidá de reconocer a les ""nueves realidaes"" de la emigración, como asociaciones de mocedá. Sin embargu, destacó'l valor de los Centros Asturianos. Nesti sen, dixo que si, como se diz nel proyeutu, se pretende abrir la reconocencia d'asturianía a toles entidaes singulares, abriríase una ""nueva dimensión"" al sistema de rellaciones ente'l Principáu y les comunidaes asturianes.

Mostróse partidaria d'adautar les nueves formes d'asociación añadiendo un artículu específicu nel que se regule la figura de ""entidaes collaboradores cola asturianía"", con rangu institucional non equivalente al de los Centros Asturianos.

Nesti sen, Manuel de la Cera añadió que l'ampliación d'asturianía a otres asociaciones pue llevar a la ""confisión"". Asina señaló que la base territorial d'una asociación pue ser mui plural, pero la residencia de los sos componentes tien de ser na so totalidá fuera d'Asturies.

Defendió amás que se caltenga la ""prioridá"" pa los centros asturianos pol so patrimoniu históricu y pola so proyeición de futuru. ""Onde nun hai centros asturianos piérdese la cultura asturiana"", señaló. Asina, dixo que la nueva llei ha reconocer nueves formes d'emigración, pero siempre dando ""prioridá"" al caltenimientu económicu de los centros asturianos, y escluyendo asociaciones que tengan asociaos residentes nel Principáu. ""Nun se pue sovencionar a entidaes residentes n'Asturies con dineru de la emigración"", afirmó.

""Si nun se corrixen defeutos y ambigüedaes del proyeutu, la nueva norma pue ser un pasu p'atrás en rellación a la llexislación de 1984"", dixo De la Cera.

COMENTARIOS PERSONALES

El diputáu d'Izquierda Xunida-Bloque por Asturies-Verdes, Francisco Javier García Valledor, renunció a realizar entrugues a Manuel de la Cera, al considerar la so opinión ""irrelevante"", al entender que se trataba d'unos comentarios ""personales"" y non atribuyibles al Conseyu de Comunidaes Asturianes, dao que De La Cera nun convocó nengún conceyu pa falar sobre la so declaración de güei.

Tamién consideró ""irrelevante"" la declaración de la conseyera, dao que de lo que se faló ye d'una proposición de llei relativa a l'asturianía, ""na que'l Gobiernu nun tuvo la iniciativa"".

Recordó que la intención de facer una nueva llei yá nació nel 2005 y que'l proyeutu presentáu recueye les propuestes de la federación de centros asturianos pa lo que diba ser un anteproyeutu de llei. Afirmó que les persones que tán declarando estos díes dieron muestres del ""acuerdu xeneralizáu"" sobre la ""necesidá imperiosa"" d'un nueva norma."