“Va superándose’l debate ente sí o non a la oficialidá; yá tamos falando de cómo va ser esa oficialidá”, afirma Galán

El vienres y el sábadu va celebrase nel Edificiu Históricu de la Universidá d’Uviéu’l Seminariu ‘Oficialidá, el camín constitucional pal futuru del asturianu’ cola participación d’espertos en dellos campos. “La sociedá necesita información”, destaca Inaciu Galán, que ve superáu l’alderique sobre oficialidá sí o non y cree que ye’l momentu de construyila: “yá tamos falando de cómo va ser”.

Cola intención de siguir avanzando nesi sen, Iniciativa pol Asturianu va poner el ramu al seminariu con una mesa redonda entitulada ‘¿Qué modelu d’oficialidá precisa Asturies? Construyendo’l consensu constitucional’, a la que tán convidaos los cuatro partíos con representación parllamentaria favoratibles a la oficialidá, esto ye, FSA, Podemos, Izquierda Xunida (IX) y Foro. A falta de confirmar el representante de la formación creada por Francisco Álvarez-Cascos, van acudir a la cita María Luz Pontón, Andrés ‘Ron’ Fernández Vilanova y Concha Masa, de manera respeutiva.

“Dende Iniciativa pol Asturianu entendemos que ye’l momentu, nesti ámbitu nel qu’hai una cierta discusión sobre’l modelu d’oficialidá y que paez que, pasu ente pasu, va superándose’l debate ente sí o non a la oficialidá y yá tamos falando de cómo va ser esa oficialidá, de dir plantegando cuál va ser el marcu d’oficialidá que queremos n’Asturies”, afirma Galán. El presidente del coleutivu qu’entama estes xornaes considera qu’hai que siguir construyendo “consensos” al rodiu d’esta cuestión y que “la sociedá necesita muncha información”, más cuando tán dándose “munchos datos erróneos”, motivu pol que se pon en marcha esti ciclu de conferencies y meses redondes.

“La oficialidá nun ye más que la representación llegal de cómo n’España se cuiden les llingües al traviés d’un modelu constitucional que marcal’artículu 3.2”, recuerda Galán, qu’apunta que’l seminariu “pretende ser un espaciu abiertu nel que persones espertes en distintos sectores que toquen a la oficialidá puedan esplicar cuestiones sobre otros modelos d’oficialidá y cómo pueden encaxar dientro del marcu llegal d’Asturies”. La inscripción pa participar sigue abierta, anque ye posible que la organización se vea obligada a zarrala por aforu, con más de 150 persones apuntaes hasta la fecha, “lo que reflexa la demanda que tien la sociedá de conocer cómo va ser la oficialidá, cómo va tener que ser y qué modelos hai”.

Ellaboración d’un documental sobre casos de discriminación

L’Aula Magna del Edificiu Históricu de la Universidá d’Uviéu va acoyer toles actividaes del seminariu, que va comenzar mañana, a les 16.30 hores, cola intervención de Galán y del rector, Santiago García Granda. Darréu, Xosé Antón González Riaño, presidente de l’Academia de la Llingua Asturiana (ALLA), va falar del ‘Marcu xeneral d’aplicación de la oficialidá”.

Tres una posa, a les 18.30 hores, va estrenase’l documental, fechu a costafecha pal seminariu por Iniciativa pol Asturianu y Cuatro Gotes Producciones, ‘La vida ensin oficialidá: les consecuencies de la falta de drechos llingüísticos n’Asturies’. Nél van esponese casos de discriminación llingüística, “testimonios importantísimos de dar a conocer porque muestren que nun sólo tamos falando de defender un patrimoniu cultural, que tamién y por supuesto, sinón que tien repercusiones na vida de les persones y que xenera problemes nel so día a día”, afirma Galán.

Isabel Hevia, profesora y investigadora de Ciencies de la Educación de la Universidá d’Uviéu, va tratar a les 19 hores sobre ‘Les ventayes de la presencia del asturianu nel sistema educativu’, pa zarrar la primer xornada José Manuel Pérez Fernández, lletráu del Tribunal Constitucional y profesor de Derechu Alministrativu de la Universidá d’Uviéu, cola conferencia ‘Constitución y llingües: oficialidá, conteníu y desendolque’. El sábadu, mentes, l’actividá va comenzar a les 10 hores cola intervención ‘L’apoyu social al asturianu. Datos del III Estudio Sociolingüístico de Asturias’, de Francisco José Llera Ramo, caderalgu de Ciencia Política de la Euskal Herriko Unibertsitatea, direutor del Euskobarómetro y autor de dichu estudiu por encargu de l’ALLA.

La normalización llingüística nos conceyos tamién va tener el so espaciu nos conceyos, con una mesa redonda a les 10.30 hores baxo’l nome ‘L’exemplu de la normalidá de la normalización nos conceyos’. Tres una posa, va tomar la pallabra Xosé Alba, profesor d’Economía Aplicada de la Universidá d’Uviéu, pa esplicar ‘Aspectos económicos de la oficialidá: nin tantu coste nin namás coste”, pa siguir col escritor y Premiu Nacional de Lliteratura Asturiana Xuan Bello, que va falar de ‘La oficialidá y el desarrollu cultural d’Asturies”.

La mesa redonda de los representantes políticos, con comienzu previstu pa les 13 hores, va zarrar el seminariu, anque l’alderique de xuru va siguir nuna espicha prevista a les 14.30 hores na sidrería La Pumarada. El so preciu ye de 25 euros y p’acudir ye necesario apuntase nel momentu de facer la inscripción.

Na semeya, Galán y Sabel Tuñón, vocal de Voluntariáu d'Iniciativa pol Asturianu, na presentación del seminariu.