El grupu socialista presenta nel Senáu una moción pa incluyir el túnel del Fitu nel Plan d'Infraestructures

"El Grupu Socialista nel Senáu presentó güei nel Rexistru de la Cámara una moción na qu'encamentó al Gobiernu a que, al traviés del Ministeriu de Fomentu y nel marcu de la revisión del Plan Estratéxicu d'Infrestructures y Tresporte (PEIT), que va entamar nel 2009, analice col Principáu d'Asturies la conexón de l'autovía A-8 con Les Arriondes, mediante un túnel baxo la Sierra'l Sueve, atravesando'l paraxe conocíu como Altu del Fitu.

Na esposición de motivos d'esta iniciativa que va tratase na Comisión de Fomentu del Senáu, los socialistes indiquen que l'Autovía del Cantábricu, denominada A-8, ta considerada como una vía de gran capacidá, de trazáu perimetral y d'articulación de les comunicaciones nel Cordal Cantábricu.

Recuerden amás qu'ún de los oxetivos del PEIT ye fortalecer la cohesión social y territorial, asegurando unes condiciones d'accesibilidá iguales al conxuntu del territoriu, cuestió a la que contribúi l'Autovía A-8, de conexón ente distintes comunidaes autóomes del norte d'España y tamién de comunicación tresfronteriza con Europa.

Nesti marcu, el PEIT plantega la cooperación coles alministraciones titulares de les distintes redes viaries pa establecer el desarrollu más apropiáu del territoriu, reduciendo la so ocupación y fragmentación y evitando actuaciones que puean entrar en conflictu.

Nel casu d'Asturies, l'autovía del Cantábricu A-8, de titularidá estatal, tien de complententase col restu de la rede estatal y cola rede de carreteres autonómica pa garantizar l'accesibilidá al territoriu, de manera qu'asegure la comunicación intra-rexonal, especialmente incorporando los territorios con menores posibilidaes de desarrollu.

A lo cabero, la propuesta socialista recuerda que los criterios d'ordenación del territoriu del Principáu d'Asturies, recoyíos nes Directrices Rexonales d'Ordenación del Territoriu, establecen un Área de Planificación Territorial y Xerarquización funcional de los núcleos de población.

Con esti oxetivu, defínese al nucleu de Les Arriondes como cabecera de la Comarca oriental asturiana, calificación de la deriva da decisión d'asitiar nesta llocalidá, a la que s'accede al través de l'autovía A-8, la carretera N-634 y la carretera autonómica AS-260, los equipamientos de segundu nivel."