La UE diz que la financiación inicial d'El Musel (Xixón) ta "garantizada", nun siendo que s'incumplieren les normes

"La comisaria de Política Rexonal, Danuta Hübner, dixo güei que la financiación europea que yá recibió España pal proyeutu d'ampliación del puertu d'El Musel de Xixón nun peligra, nun siendo que se constate qu'hubo dalgún incumplimientu de la llexislación comunitaria.

No que cinca a los nuevos fondos solicitaos poles autoridaes españoles de les perspectives financieres 2007-2013, Hübner confirmó de nuevo qu'esti pidimientu quedó en suspensu porque l'Executivu comunitariu ta investigando la modificación del contratu d'obres d'El Musel pa confirmar si respeta o non la normativa comunitaria en materia de contratación pública.

La comisaria de Política Rexonal dio estes esplicaciones en respuesta a una entruga plantegada pol eurodiputáu del PP Salvador Garriga. El parlamentariu entrugaba al Executivu comunitariu sobre los motivos de la suspensión, sobre'l so impautu na financiación del proyeutu y sobre si existe la posibilidá de que peligren les cantidaes recibíes poles autoridaes españoles correspondientes al periodu 2000-2006.

Na so respupesta, Hübner asegura que ""en cuaqluier casu, la financiación del proyeutu inicial ta garantizada siempre que nun se plantegue un incumplimientu de les normes del derechu comunitariu"".

La responsable de Política Rexonal esplica que los servicios de la Comisión yá notificaron a les autoridaes españoles que suspendieron la so solicitú de nuevos fondos por implicar un cambiu nel contratu d'obres del puertu.

""Por una quexa unviada a los servicios de la Comisión na que se cuestiona la compatibilidá de modificación tala del contratu d'obres cola normativa comunitaria de contratación pública, ta estudiándose'l casu"", esplica Hübner.

""Una vez acabáu esti exame, la Comsión va comunicar les sos conclusiones a les autoridaes españoles"", acaba la respuesta.

El proyeutu d'ampliación del puertu d'El Musel foi oxetu d'una denuncia ante la UE per parte de Los Verdes polos escesos de coste del proyeutu, qu'ascienden a 216 millones d'euros. El presidente de l'Autoridá Portuaria de Xixón, Fernando Menéndez Rexach, ta acabante d'almitir que'l proyeutu sólo tien fondos garantizaos hasta últimos d'esti añu. El Conseyu d'Alministración del muelle xixonés axudicó'l proyeutu por 580 millones d'euros."