L'UD Gijón Industrial-UP Langreo, ente los partíos investigaos por posible amañu por apuestes

Disputóse en payares y finó con un empate a dos goles. Hai 51 choques de Segunda B, Tercera y Copa Federación baxo sospecha.

La investigación abierta sobre amaños n'apuestes deportives que yá llevó a la detención d'una trentena de persones chisca al fútbol asturianu. El partíu ente l'UD Gijón Industrial y l'UP Langreo, de la xornada 14 del grupu 2 de la Tercera División, apaez nuna llista de 51 partíos d'esta temporada y les dos anteriores baxo sospecha de tener pautaes una serie de xugaes, principalmente corners, de cara a sacar beneficiu n'apuestes en China.

Nengún de los dos clubes tienen constancia d'estos fechos y amosaron la so sorpresa por tar incluyíos nesta investigación. L'Indus asoleyó un comunicáu oficial nel que afirma que nun recibió "comunicáu oficial nengún de les autoridaes competentes al respeuto" y nel qu'espresa'l so refugu a "cualquier aición en contra de la honestidá deportiva".

Pela so parte, l'Unión tamién fixo una declaración nel mesmu sen que'l conxuntu de La Calzada, añadiendo que "nel supuestu de que dalgún miembru del club tuviera involucráu, quedaría espulsáu darréu y emprenderíense aiciones llegales vía penal".