Air Nostrum recuperará la ruta d'Asturies-Lisboa na próxima primavera

"Air Nostrum va volver enllazar Asturies con Lisboa dende'l próximu 29 de marzu. La ruta va ponese en serviciu con dos vuelos selmanales en cada sentíu, y va ampliase a cuatro vuelos selmanales n'agostu. La compañía realizó esta ruta demientres parte del branu y hasta'l 7 de setiembre.

Según informó la empresa nuna nota prensa, la bona respuesta de la ruta qu'algamó una ocupación media superior al 65%, llevó a l'aerollinia a apostar por esti enllace. Asina, dende'l próximu 29 de marzu del 2009, y pa tola temporada de branu, ye dicir, hasta'l 24 d'ochobre, van fletase dos vuelos selmanales en cada sentíu, que van ampliase a cuatro vuelos selmanales na subtemporada d'agostu (dende la última selmana de xunetu a la primer de setiembre).

Los dos vuelos selmanales de branu van tener llugar los vienres y domingos, col oxetu de facilitar les estancies de fin de selmana. Ta previsto que los aviones salgan dende l'aeropuertu d'Asturies, los vienres, a les 11.15 hores; y a les 10.30, los domingos. En sen contrariu, les aeronaves tienen fixáu'l despegue a les 12.10 hores los vienres, y a les 11.25 hores los domingos.

La compañía amás, decidió llanzar una promoción dirixida a los asturianos nel estranxeru. D'esta manera, y col fin de facilitar un mayor accesu a los emigrantes asturianos en Bruseles a precios promocionales pa les feches de mayor demanda, Air Nostrum punxo a la venta una tarifa especial de 99 euros ida y vuelta (too incluyío), tanto pal periodu de Navidá (del 19 d'avientu al 6 de xineru), como p'agostu (dende la última selmana de xunetu hasta la primer selmana de setiembre). Esta tarifa ta disponible nes principales axencies de viaxe de Bélxica.

Per otra parte, la compañía va aumentar la capacidá de los aviones que cubren la ruta dende Asturies a Valencia y Sevilla. Los vuelos qu'unen Asturies con Valencia y con Sevilla van pasar a fletase los vienres y los domingos, con un reactor CRJ 900 (con capacidá pa 89 pasaxeros). La intención ye la d'atender la mayor demanda que se rexistra nestes rutes demientres el fin de selmana. Esta midida va suponer un incrementu d'un 78% na ufierta global de places pa estos díes."