Xeitu: “Cada día poténciense más otru tipu de fiestes o celebraciones que poco tienen que ver cola nuesa tierra”

2017 supunxo pa Xeitu la vuelta al Festival Interceltique de Lorient, nel que foi protagonista poles sos actuaciones y pol so espectáculu xunto cola Banda Gaites Candás, que namái pasó desapercibíu pa les alministraciones del país. Pau Santirso (Uviéu, 1979) y Olaya García (Uviéu, 1984) son el direutor y la gaitera y secretaria d’esti grupu de baille.

¿Cuándo naz Xeitu?

Olaya: El grupu de baille tradicional Xeitu naz nel añu 2005 baxo la direición de Paulino Santirso y María Vázquez, los dos con trayeutories mui relevantes nesti ámbitu. Cola intención de conservar y difundir la música y el baille tradicional asturianu, y gracies al llabor entusiasta de los sos componentes, mostramos una representación artísticu-escénica de la diversidá musical asturiana d’oriente a occidente.

¿Cuánta xente compón el grupu?

Paulino: Agora mesmu somos más de 35 persones, con edaes que van dende los 18 a los 65 años. Los xeitinos son xente divertío, comprometíos cola tradición, cola indumentaria y con la fala del nuesu país. ¡Son lo meyor! Nun podemos tar  más arguyosos de la xente cola que contamos.

¿Cómo foi’l 2017 pa la formación?

Paulino: Foi ensin dulda un añu de munchu trabayu, pero también de munches satisfaiciones. El reconocimiento del públicu, el que te feliciten cuando nos ven… Ésa ye la meyor recompensa que podemos recibir.

La participación nel Festival Interceltique de Lorient supunxo l’actividá central de Xeitu. ¿Qué tal la esperiencia?

Paulino: Xeitu ya tuvo nel FIL nel añu 2013, añu dedicáu a Asturies, y foi impresionante, pero pa munchos componentes yera la primer vegada que lu visitaben. Foi una esperiencia guapísima: rises y llantos pre y postactuaciones, munchos nervios… ¡Pero de xuru que toos volveríen repetir!

¿Qué supón tar presente nun certame de la envergadura del que se celebra n’An Oriant?

Paulino: A nivel artísticu ye una de les esperiences más impresionantes que xente amateur como nós pue llegar a vivir… Tamos falando de baillar nun estadiu con 6.000 espectadores y d’un desfile con 70.000 persones aplaudiéndote. El públicu bretón y les miles de persones que visiten esi festival son xente entregadísima. Ye impresionante’l recibimientu que te faen. Tol mundo debería vivilo al menos una vez.

¿Cree que falta conciencia dende l’Alministración del escaparate que ye l’Interceltique p’Asturies?

Olaya: Sí, de xuru. L’Alministración nun ye consciente de l’escaparate que supón el Festival Interceltique p’Asturies, tantu dende’l puntu de vista turísticu como cultural. Son miles de persones les que pasen per ellí cada branu, potenciales visitantes de la nuesa tierra. Esti pasáu agostu calcúlase que pasaron pel FIL 750.000 persones, y sólo nel Desfile de les Naciones Celtes del primer domingu del festival hebo 60.000 persones viéndolu.

Esti añu, por exemplu, nun hebo’l tradicional chigre d’Asturies, presente dende’l 2003.

Olaya: Pa nosotros, los grupos asturianos participantes nel FIL d’esti añu, foi una triste sorpresa atopanos ensin la nuesa casa en Lorient. Yera el puntu d’alcuentru y de intercambiu cultural col restu de les naciones celtes onde lo tenemos pasao perbién n’ediciones anteriores. Pensamos que la gastronomía, la cultura de la sidra y el chigre tamién ye una parte más que compartimos coles otres naciones celtes, asina como la música y los bailles.

Xeitu llevó a Breizh un espectáculu especial pa les sesiones de la Nuit Interceltique Bretagne. ¿En qué consistía?

Paulino: Pues ficimos un saltón, que ye un ritmu mui allegre y mui carauterísticu d’Asturies. Tuvimos la suerte de trabayar y compartir escena cola Banda de Gaites de Candás, que ficieron un arreglu musical mui prestosu, y el resultau foi mui elegante, al menos dende’l nuestru puntu de vista.

¿Trayer esta actuación a Asturies resulta complicao?

Olaya: Pues sí, ye bastante complicao. Movilizar a tantos músicos y baillaores nun ye nada fácil, y amás esti tipu d’espectáculos tán poco sofitaos pola Alministración. El públicu n’Asturies pa esti tipu d’eventos, anque tán medrando, entovía ye mui minoritariu, y cada día poténciense más otru tipu de fiestes o celebraciones que poco tienen que ver cola nuesa tierra. Hai que puxar por ello, polo de nueso, algamar más apoyos y facenos más visibles.

¿Cuáles son les principales torgues qu’atopa un grupu de baille como Xeitu pa desendolcar el so llabor nel país?

Olaya: Pasa un poco lo mesmo como lo de trauyer una Nueche Máxica a Asturies. Munches veces nun atopamos un sitiu afayadizu pa poder desendolcar la nuesa actividá. Los ayuntamientos y otres alministraciones nun valoren muncho el nuesu trabayu, polo qu’el preciu qu’ufiertamos poles nuestres actuaciones siempre-yos abulta caro. Ye difícil acceder a les ayudes públiques… Nun hai más que ver el declive de les nueches folk, que yá son contaes les que queden. Sicasí, nun dexaremos de lluchar por amosar lo que más nos presta: el folclor y la tradición asturiana.

Xeitu cuenta una escuela propia. ¿Cómo trabaya?

Paulino: Tenemos agora mesmu una escuela con trés niveles: aniciu, mediu y avanzáu. Ye’l quintu añu y la verdá ye que la acoyida cada añu ye más numberosa. Hai muncha xente interesao en deprender a baillar pero ensin tener el compromisu de pertenecer a un determináu coleutivu o de vistir dalguna indumentaria concreta. Muncha xente quier baillar y punto. ¡Entós la nuesa escuela ye’l llugar perfeuto! Tamos mui contentos.

¿Hai xente mozo interesao nel baille tradicional?

Paulino: Creemos qu’agora’l mundo del baille tradicional ta despertando muncha curiosidá, y hai muncha xente mozo na nuesa escuela que vien a divertise y a conocer a otra xente. L’ambiente que se crea tanto nes clases como nes Nueches en Danza o en cualquier folixa onde se pueda armar un baille ye una pasada.

¿Qué espeutatives tien Xeitu pa esti añu?

Olaya: Tamos trabayando pal aniciu de la nueva temporada 2018, que comenzará en marzu, y tamién tenemos dalgún qu’otru proyeutu interesante ente manes que pronto verá la lluz…, pero de momento nun podemos adelantar más datos.