Aprobaes un total de 459 places pa docentes en Secundaria y Formación Profesional

La convocatoria d’oposiciones pa Secundaria y Formación Profesional n’Asturies va ser pa 459 places, 358 en Secundaria y 101 en Formación Profesional. El conseyeru Genaro Alonso ta a la espera d’una propuesta nueva de la Universidá d’Uviéu pa da-y el preste al demandáu grau d’Organización Industrial.

El Conseyu de Gobierno aprobó la oferta d’emplegu de la Conseyería d’Educación y Cultura pa esti añu, que se concreta en 459 places pa docentes de los cuerpos de Secundaria y Formación Profesional (FP). Esta cifra inclúi los 345 puestos de la ufierta d’emplegu público del 2017 –aprobada’l 14 d’avientu– y los 114 correspondientes al 15 por cientu de la tasa adicional d’estabilización d’esti exerciciu.

El númberu de places por especialidá va anunciase a lo llargo del mes, siendo diecisiete les estayes pa Secundaria a les que se pue opositar: Filosofía, Lengua Castellana y Literatura, Xeografía y Historia, Matemátiques, Física y Química, Bioloxía y Xeoloxía, Francés, Inglés, Educación Física, Orientación Educativa, Teunoloxía, Asesoría y Procesos d’Imaxe Personal, Hostelería y Turismu, Organización y Procesos de Mantenimientu de Vehículos, Organización y Proyeutos de Fabricación Mecánica, Procesos de Producción Agraria, y Procesos y Medios de Comunicación. Mentes, en FP salen pa diez disciplines: Cocina y Pastelería, Estética, Instalaciones Lletrotéuniques, Llaboratoriu, Mantenimientu de Vehículos, Peluquería, Procedimientos de Diagnósticu Clínicu y Ortoprotésicu, Procedimientos Sanitarios y Asistenciales, Sistemes y Aplicaciones Informátiques, y Téuniques y Procedimientos d’Imaxe y Soníu.

Les pruebes pal axudicamientu d’estes places va celebrase na segunda quincena de xunu, siendo esta convocatoria la mayor de la historia d’Asturies. El 7 por cientu de les mesmes resérvense pa persones con discapacidá.

A la espera

El preste definitivu del grau d’Organización Industrial que quier implantar la Escuela Politéunica d’Inxeniería de Xixón, reclamáu tamién pola patronal, va tener qu’esperar a una propuesta nueva por parte de la Universidá d’Uviéu, anunció Alonso, tres refugar nun primer momentu l’Alministración esta opción. Les alegaciones de la institución académica al informe de la Direición Xeneral d’Universidaes y Investigación que nun consideraba oportuna la so creación nun son les afayadices, apuntó’l conseyeru.

Semeya obra d'Armando Álvarez.