Entámase una edición nueva de 'Escrifala', taller de conversación y redaición n'asturianu

Recomiéndase un conocimientu previu del idioma pa esta iniciativa de baldre que comienza en Corvera'l día 28.

'Escrifala' trátase d'un taller de cincuenta hores de llargor con dos periodos de sesiones, de febreru a mayu y d’ochobre a avientu, que se centra n’esclusiva nel usu oral del idioma y na meyora del asturianu escritu. Va comenzar el día 28, siendo los díes d'activida los miércoles, de 18 a 20 hores, nel Centru Sociocultural de Les Vegues.

Los participantes van poder conocer les posibilidaes espresives de la llingua asturiana, estremando rexistros, aumentando’l léxicu, etc. D'igual forma, el taller tamién ye un mecanismu d’afondar y encuriosar la manera d’escribir n'asturianu.

Dende la Casa de la Llingua recomienden a les persones interesaes n'asistir a 'Escrifala' tener un conocimientu previu de llingua asturiana, dirixéndose esti taller sobre manera p’aquelles persones que yá fixeren cursos d’asturianu, yá sía de nivel básicu o avanzáu. Al respeuto, Corvera tien abierta tamién la matriculación pa un cursu de baldre d'iniciación al idioma, que va ponese en marcha'l día anterior, el 27, nel mesmu llugar con clases tolos martes de 18 a 20 hores.

Los ciudadanos que quieran matriculase en cualquier de les dos actividaes qu'entama'l Conceyu de Corvera han de formalizar la inscripción al traviés de los rexistros municipales, siendo'l día caberu'l de comienzu de les mesmes.