El Sporting algamó’l tercer trunfu consecutivu

"El Sporting de Xixón ganó esti domingu al Deportivo de La Coruña en Riazor con un contudente 0 a 3. Gracies a un mui bon partíu los asturianos son quien a encadenar tres victories consecutives qu'asitien al Sporting nel puestu decimuterceru de la clasificación con nueve puntos. Bien llueu l'equipu asturianu resolvió'l partíu en Riazor énte un Deportivo mui feble nel área atacante y pocu cenrtráu defensivamente, frente a un Sporting ordenáu y nel que Barral, que salió de titular en cuentes de Bilic, foi'l xugador mas desequilibrante del partíu.

Y ye que yá nel minutu 23 un centru de Morán al propiu Barral acabó nun remate que rechazó'l porteru Aranzubía, pero que cayó otra vuelta a la vera de Barral, siendo derribáu en penalti claru por Colotto. El propiu delanteru foi l'encargáu de marcar el penalti. Enantes qu'acabase la primer parte'l partíu yá taba decidíu a favor de los xixoneses por cuenta que malpenes tres minutos depúes, nun contrataque de manual, Barral centraba a los pies de Carmelo, que namás tuvo que da-y un toque a la pelota pa marcar. Yá al final d'esta parte Colotto foi espulsáu con roxa directa por facer falta a Barral cuando diba a encarar solu a Aranzubía. Con un 0 a 2 nel marcador y un xugador menos la goleada del Sporting pudo ser d'escandalu si nun fuere poles intervenciones del porteru deportivista.

Sicasí, el Deportivo de La Coruña siguió intentándolo anque, sacante un par d'ocasiones, amosaron un ataque mui poco efectivu. Nel minutu 85 llegó'l tercer gol obra de Diego Castro al plantase solu delantre'l porteru deportivista tres un gran pase de Camacho. Al final l'Sporting algamó la so tercer victoria consecutiva nun estadiu enllenu de seguidores asturianos. Con esti resultáu l'equipu xixonés amuesa que los trunfos pasaos nun fueron casuales. Paez que Manolo Preciado foi quién a montar un equipu competivu y con garantíes.

Ficha técnica:

Deportivo: Aranzubía, M. Pablo, Lopo, Colotto, Filipe, Sergio (73'), De Guzman, P. Álvarez (37'), Lafita, Guardado, Riki (73'), Fabricio, Zé Castro, Piscu, J. Rodríg. (73'), Valerón (37'), Omar Bravo, Mista (73').

Sporting: Cuéllar, Sastre, Neru, Gerard, Canella, Camacho, Míchel, Diego Castro, Carmelo, Luis Morán, D. Barral, Sergio Sánchez, I. Hernández, K. Mateo, Matabuena (81'), Jorge, Omar (87'), Bilic (67').

Goles: 0-1 David Barral (23'). 0-2 Carmelo (26'). 0-3 Diego Castro(85').
Árbitru: Teixeira Vitienes. Espulsó a Colotto por roxa directa (44'). Tarxetes amarielles a Neru (37'), Camacho (41'), Aranzubía (44'), Lopo (72') y Míchel (73')."