Polo menos 1,7 millones de desallugaos forzosos volvieron a Sur de Sudán dende la firma del acuerdu de paz, hai 3 años

"Cerca de 1,7 millones de persones desallugaes volvieron al sur de Sudán dende qu'esta rexón semiautónoma firmare un acuerdu de paz col norte nel 2005, según ingormó güei la Organización Internacional pa les Migraciones (OIM).

Cerca d'un 60 por cientu de les families que vuelven a Sur de Sudán tán encabezaes por muyeres solteres, y el 5 9 por cientu de los que tornen son neños d'ente cinco y 17 años, añade la OIM.

Una evaluación realizada en marzu del 2005, poco dempués de que se firmare l'acuerdu, estimaba que polo menos cuatro millones de persones treslladárense dende o dientro de Sur de Sudán demientres los 20 años d'enfrentamientos ente'l norte y el sur del país.

D'acordies con un informe de la OIM, basáu n'entrevistes con 875.000 desallugaos internos demientres el so regresu a casa, el 75 por cientu emplegó autobuses o camiones pa volver, un 17 por cientu fízolo andando, el cinco por cientu viaxó en barcu y un tres por cientu lo fizo n'avión.

La vocera de la OIM, Jemini Pandya, dixo que ye un signu positivu el que la xente entamare a tornar a los sos llugares d'orixe, destruyíos pola guerra, ""casi darréu"", dempués de que se firmare l'acuerdu de paz. ""Hai una especie d'enfotu y vuelve tenese fe sobre'l futuru de Sur de Sudán"", añadió Pandya.

La información detallada sobre aquellos que busquen volver establecer les sos residencies na rexón debería yudar a los programes d'ayuda a los trabayadores humanitarios y de les autoridaes gubernamentales, que cubren l'ayuda alimentaria, el refuxu, l'asistencia sanitaria y la distribución d'otru tipu de suministros vitales, d'acuerdu cola OIM.

""El siguimientu de los retornos espontáneos, particularmente a nivel llocal, mos da información importante sobre les necesidaes de la reintegración de los individuos y de les families"", declaró'l director de la misión, Mario Tavolaj. ""Tamién supón una ferramienta importante pa planiar la recuperación a mediu y llargu plazu en Sur de Sudán"", añadió."