Corvera ufre un cursu básicu d'asturianu

Va comenzar el martes 27, con matrícula de baldre que se pue formalizar hasta esi día.

El Conceyu de Corvera entama un añu más por estes feches el so Cursu Básicu de Llingua Asturiana, que pretende "ser un mecanismu pa la población adulta de deprendimientu de les normes básiques d’escritura del idioma, pero tamién una manera d’acercase a aspectos de la cultura asturiana". Asina, los participantes van dar los conteníos siguientes: historia de la llingua asturiana; léxicu, sintaxis y morfoloxía; normes ortográfiques; introducción a la toponimia de Corvera; y creación cultural n’asturianu.

Rafael Rodríguez Valdés, responsable del Serviciu de Normalización Llingüística de Corvera, va encargase de poner les clases, que van desendolcase los martes de 18 a 20 hores nel Aula Polivalente del Centru Sociocultural de Les Vegues. El so llargor va ser de 30 hores y ye de calter gratuitu.

La xente interesao en participar pue incribise hasta'l 27, primer día del cursu, nos rexistros del conceyu.