Quimarán acueye'l primer conciertu del programa cultural Antón de Marirreguera

La estaya 'Sones' d'esta iniciativa ábrese con una interpretación de pieces de música barroca nel santuariu de los Remedios.

Baxo'l nome 'Sones del barrocu: la música qu’amó Antón de Marirreguera' entámase esti ciclu de conciertos que forma parte del ampliu y variáu 'Programa Cultural Antón de Marirreguera, Carreño ñeru de la pluma n'asturianu' qu'entama hasta abril el Conceyu de Carreño. Esta estaya concreta amuesa la música que sintió y más-y prestaba al poeta, condicionando munches de les sos creaciones, en delles parroquies del conceyu.

La primera va ser Quimarán, en concreto'l santuariu de los Remedios, con una actuación de del Grupu de Téunica Vocal de la Escuela de Música Miguel Barrosa, baxo la direición del profesor David Colado y con Ángeles y María Jesús Cueva al pianu. Nel conciertu, que va tener llugar el xueves a les 17.45 hores, van interpretase delles pieces de música barroca, como aries y oratorios.

El ciclu va completase con otres trés cites: un ensemble de flautes traveseres (8 de marzu, Albandi), un conciertu de guitarres (12 d'abril, Llogorzana) y otru de dellos sones del barrocu (27 d'abril, Candás).