El PP centra la so precampaña na llucha contra l'asturianu

El presidente de Nuevas Generaciones diz que la izquierda quier "tener a la mocedá apresao a la Academia de la Llingua".

Esta fin de selmana Nuevas Generaciones del PP n'Asturies celebraba'l so congresu y escoyía cabezaleru nuevu, Andrés Ruiz, y los dirixentes populares aprovecharon p'afondar nel so discursu d'ataque a la llingua asturiana y d'asociación de la cooficialidá col radicalismu y con "estrema izquierda".

De fechu, en toles intervenciones de les últimes selmanes, los dirixentes del PP siempre que falen de la posibilidá de que l'asturianu seya llingua oficial faen comparances col casu catalán, alvirtiendo del "peligru" de que la reconocencia de los derechos llingüísticos constitucionales n'Asturies seya'l primer pasu pa un procesu independentista.

Asina, Andrés Ruiz, afitó nel so discursu qu'ún de los principales problemes que tien la mocedá n'Asturies ye la posibilidá de que l'asturianu seya llingua oficial y alvirtió solemne de que la xente partidario de la cooficialidá d'asturianu y castellanu "quier tener a la mocedá apresada a la Academia de la Llingua".

Nesa llina, Ruiz dixo que lo primero que va facer como presidente de la organización ye promover una declaración institucional contra la oficialidá del asturianu, "pol so impactu negativu pal futuru de la mocedá n'Asturies".

Equilibru difícil y comparanza incómoda con Galicia

Esti discursu radicalizáu del PP va contra la so propia trayectoria al truñar abiertamente contra l'Academia de la Llingua Asturiana, contra'l procesu de normalización, al que llama "bable-inventado", o apoyando les denuncies contra les ordanances municipales, que remanecen de la llei d'usu aprobada pol propiu Partido Popular, fixo que mesmamente Ciudadanos se refiere a la formación popular como ún de los "partíos que tán contra l'asturianu".

Nesi sen el PP asturianu fai por esplicar daqué que paez inesplicable; cómo se pue tar a favor del asturianu y de la Llei d'Usu cuando nos sos fechos y les sos declaraciones nun faen otro qu'atacar la posibilidá de la normativización y la normalización, la única forma contrastada nel mundu conocíu pa caltener una llingua que ta nel espíritu y la lletra de la Llei d'Usu y a la que la cooficialidá-y daría un desarrollu acordies cola Constitución Española.

Per otru llau, l'ataque xenéricu a la cooficialidá de les llingües y los sos "peligros", ta dexando al PP d'otres comunidaes nuna posición incómoda, al defender los sos homólogos asturianos unes posiciones que n'otros territories s'entienden como preconstitucionales.

Asina, el propiu ministru Javier Maroto tuvo la selmana pasada que pone-y una vela a dios y otra al diañu defendendo per un llau la posición del PP n'Asturies contra l'asturianu y pel otru emponderando la política llingüística de Feijoo en Galicia.