Ana Cano: “Fernández de Castro emplega contra la presencia del asturianu na Facultá de Filoloxía argumentos políticos, non académicos”

"En declaraciones a Asturies.com la presidenta de l’Academia de la Llingua Asturiana y exdecana de la Facultá de Filoloxía señaló que “evidentemente el profesor Fernández de Castro tien total llibertá pa presentar esa enmienda y redactar esa carta anunciando la so intención nos términos que quiera, pero en cualquier casu debería argumentar en base a criterios académicos y non políticos, qu’amás nun son ciertos”.

Ana Cano conseñó que “ye de llamentar que s’utilicen argumentos non académicos”, y recordó que “cuando n’anterior votación planteamos la inclusión del asturianu nos nuevos planes d’estudiu, fixímoslo en base a criterios académicos, que son los que se deben emplegar na Facultá de Filoloxía”. Asimesmo añadió que “l’asturianu debe tar presente na Universidá, ente otres munches razones porque’l profesoráu d’asturianu tien de formase en base a enseñances reglaes, que son el calce normal pa desempeñar la so función”."