La Xunta pola Defensa de la Llingua refuga'l 'mínor' d'asturianu y exixe un títulu de grau de llingua en Filoloxía

"La Xunta pola Defensa de la Llingua Asturiana consideró güei ""irrenunciable un títulu de grau en Filoloxía Asturiana"", polo que mostró'l so refugó a que ""la llingua asturiana quede reducida a un 'mínor', como propón el decanu, porque suponía una marcha atrás inalmitible 12 años depués de que la institución aprobare la creación d'una llicenciatura y nun supón el necesariu esfuerciu pa reasitiar la llingua nel espaciu académicu que-y correspuende"".

Asina lo espeyó la organización nun comunicáu, nel qu'anunció que va tener mañana un conceyu col decanu de Filoloxía, José Antonio Martínez, pa tratar esti tema. El responsable de la Facultá defende la posibilidá d'un 'mínor', itinerariu menor de 48 creitos, como solución propuesta, tras aprobar la Xunta de Facultá de xunu una enmienda na que se refugaba la presencia de la llingua al traviés d'un mínor y un maior (72 creitos) dientro d'un títulu de grau de llingües modernes, nos estudios reglaos de la Universidá. La votación d'esta propuesta del profesor Félix de Castro supunxo la dimisión de l'anterior decana y actual presidenta de l'Academia de la Llingua, Ana Cano.

Dende la Xunta pola Defensa de la Llingua Asturiana entiéndese que ""correspuende al nuevu rector, Vicente Gotor, y al nuevu decanu de Filoloxía, José Antonio Martínez, la busca d'una solución satisfactoria a esta llamentable situación que tien que pasar pela incorporación de la llingua asturiana nos planes d'estudiu nes mesmes condiciones que'l restu llingües"". Exixen que se reconstruya ""con procuru"" la ""mayoría que siempre existió a favor de la llingua asturiana na Xunta de Facultá de Filoloxía p'asegurar una votación que vuelva da-y al asturianu'l rangu que merez"".

El comunicáu recuerda que ""nel añu 1996 la Facultá de Filoloxía aprobó la creación d'una titulación de Llicenciatura en Filoloxía Asturiana. Dende entós hasta agora, esta decisión nunca pudo ser puesta en marcha pol bloquéu políticu del Conseyu d'Universidaes en Madrid, nun momentu nel que les titulaciones dependíen del pasu per esta institución estatal"". Señaló también que ""la Llicenciatura en Filoloxía Asturiana apoyóla tanto la Universidá d'Uviéu, al traviés de los sos órganos de Gobiernu y del rector, como pol propiu Parlamentu Asturianu qu'en 2001 votó a favor de la mesma por unanimidá"".

""Agora, énte la entrada en vixencia del nuevu marcu européu pa los estudios de Filoloxía, abríase la posibilidá d'asitiar a la llingua asturiana al mesmu nivel qu'otres llingües modernes nuna titulación de grau equivalente a les antigües llicenciatures"", esplicó. Sicasí, ""una enmienda de corte claramente políticu, que basaba'l so argumentu en que la presencia del asturianu na universidá podría ser entendida como un pasu alantre hacia la oficialidá, salió respaldada por escasu marxe de votos nuna Xunta de Facultá na que quedaba menos de la metá de l'asistencia inicial"", matizó'l testu.

La Xunta alvierte que ""nun va aceptar soluciones parciales que sigan discriminando la nuesa llingua y a aquéllos que voluntariamente quieran conocela y estudiala, y quier anunciar la so entrevista'l xueves 23 col nuevu decanu de Filoloxía na que la organización va tresmiti-y, que nun va aceptar soluciones parciales que sigan discriminando arbitrariamente al asturianu""."