El Gobiernu asturianu va poner en marcha concursos públicos pal so plan de compra de viviendes a promotores

"La conseyera d'Alministracioens Públiques y Vocera del Gobiernu del Principáu d'Asturies, Ana Rosa Migoya, dixo güei que l'Executivu asturianu tien previsto realizar la compra de viviendes a les constructores pa dempués tresformales en vivienda protexida, al traviés d'un procedimientu públicu de concursu. Asina, van ser los promotores los qu'afiten unos precios y el Principáu va elixir.

En tou casu, Migoya dixo que la intención del Executivu ye mercar eses viviendes a ""precios razonables"". La vocera del Gobiernu realizó estes considerances na rueda prensa posterior al Conseyu de Gobiernu, dempués de que'l pasáu xueves, el presidente del Principáu, Vicente Álvarez Areces, asegurare que va activar un plan pa la promoción o compra de viviendes, al traviés de la sociedá pública Vipasa.

A entrugues de los periodistes, Migoya dixo que tovía ye pronto pa saber el númeru de viviendes que van comprase a los promotores, dao que los detalles del plan tan estudiándose per parte de la Conseyería d'Economía, pa espeyalos nel proyeutu de presupuestu rexonal pal 2009.

L'oxetivu del plan ye ""algamar más viviendes sociales"" y poneles a disposición de la sociedá asturiana, esplicó la dirixente rexonal. Amás, señaló que comprando'l stock de viviendes qu'acumulen los promotores que tienen difícil la venta nel actual momentu económicu va apoyase tamién al sector."