El Principáu prepara un programa autonómicu de paraes biolóxiques pa la flota artesanal asturiana

"La Conseyería de Mediu Ambiente y Desarrollu Rural del Principáu d'Asturies ta diseñando un programa autonómicu de paraes biolóxiques pa la flota artesanal pesquera asturiana que persigue ""garantizar la sobrevivencia de los caladeros al traviés de la so rexeneración"", informó'l Principáu al traviés d'una nota prensa. El programa conlleva tamién rebaxar l'esfuerzu pesqueru y, a la vez, compensar al traviés d'ayudes a pescadores y armadores pola parada temporal de l'actividá.

El programa intégrase nel nuevu reglamentu del Fondu Européu de la Pesca, que s'aprobó'l pasáu 25 de xunetu del 2008. La iniciativa va dirixida a la flota pesquera asturiana decidada a les artes menores y tradicionales de pesa, la mayor parte de la flota d'Asturies.

En teoría, los buques en posición d'acoyese a esti programa diben ser 250 y les condiciones del mesmu tán negociándose nesti momentu dende la Conseyería, al traviés de la Direición Xeneral de Pesca, con confradíes de pescadores y Federación de Cofradíes. Nel marcu d'estes negociaciones, van determinase les condiciones particulares del programa, como por exemplu la so duración que va tener un periodu máximu de tres meses. Tamién va tener que concretase la fecha d'entamu de la paralización temporal, qu'en tou casu va tener d'entamar enantes de qu'acabe l'añu.

La Conseyería de Mediu Ambiente y Desarrollu Rural del Principáu d'Asturies pretende tener el documentu peslláu dafechu a cortu plazu y dalu a conocer ente tol sector enantes de qu'entame a aplicase, de manera tal que s'espardan los sos conteníos y que los potenciales beneficiarios puean decidir voluntariamente si s'acueyen al mesmu.

La flota pesquera asturiana ta formada na so mayoría --sobre'l 80%-- por buques dedicaos a les artes menores, l'arrascu y la volanta, que son artes tradicionales de pesca caracterizaos pol so menor impautu ambiental y poro, respuenden dafechu a la filosofía de la nueva política pesquera comunitaria y en concreto a los principios y oxetivos del Fondu Européu de la Pesca. El Gobiernu del Principáu d'Asturies quier protexer y fomentar esti segmentu tan significativu de la so flota, asegurando la pervivencia de los sos caladeros al traviés de paros biolóxicos que permitan la so rexeneración y, poro, la continuación de la so actividá pesquera."