El Principáu va contar con un análisis detalláu del impautu del cambiu climáticu na costa enantes de final d'añu

"L'Autoridá Portuaria de Xixón acoyó güei nes sos instalaciones de Quinta La Vega una xornada sobre'l Cambiu Climáticu y los sos impautos na costa española. Ún de los sos ponentes foi'l catedráticu d'Inxeniería Hidráulica de la Universidá d'Uviéu, Íñigo Losada, que nestos momentos ta al frente d'un estudiu sobre la capacidá d'adautación de la costa asturiana ante'l cambiu climáticu.

L'estudiu encargáu pol Gobiernu del Principáu va tar llistu, adelantó Losada, el próximu mes de payares, colo que les primeres conclusiones va poder analizales l'executivu enantes d'últimos d'añu.

Nesti puntu adelantó que, a falta de los resultaos finales, les primeres muestres determinen un aumentu de los vientos, el tamañu de les foles y el númberu de temporales y que la costa cantábrica tien ""poca capacidá d'adautación"".

Asina, l'estudiu va ofrecer tamién un plan d'adautación con una serie de midíes qu'indicó que nun se puen allargar nel tiempu a pesar de los momentos económicos actuales.

Y ye que Losada calcó en que'l cambiu climáticu lleva con él un cambiu obviu nos ecosistemes. Nesti sen, apuntó qu'onde más pue afeutar, nel casu d'Asturies, ye nes ríes, que nun son mui grandes y poro ""mui sensibles a los cambios del nivel de la mar"".

Nesta mesma llinia espresóse la Diretora de la Oficina pa la Sostenibilidá y el Cambiu Climáticu, Nieves Roqueñí, que recalcó que ye clara la necesidá de poner en marcha toles polítiques qu'apuesten pola reducción de los efeutos del cambiu climáticu.

Con too, señaló la importancia de ""dir preparándomos pa facer frente a los cambios nes condiciones costeres y articular respuestes""."