Todorov, Premiu Príncipe de les Lletres, considera que la causa de Garzón ye una "empresa condenada al fracasu"

"Tzvetan Todorov, Premiu Príncipe d'Asturies de les Lletres, aseguró güei ""que resolver por llei temes d'un pasáu más o menos remotu"" ye una ""empresa condenada al fracasu"" en referencia a les investigaciones que'l xuez Baltasar Garzón punxo en marcha pa determinar qué pasó coles víctimes de la Guerra Civil.

""Si sometemos el pasáu a los tribunales, tenemos que remontamos a un pasáu muncho más alloñáu"", argumentó Todorov demientres la presentación en Madrid del so llibru 'El mieu a los bárbaros' (Galaxa Gutenberg).

""Pienso qu'esos acontecimientos nun diben valir de base nos tribunales"", añadió'l premiu Príncipe d'Asturies de les Lletres, que reconoció que la so opinión obedez a ""principios xenerales"" y non a una conocencia ""concreta"" de la causa, que diz siguir con ""interés"" al traviés de la prensa.

Nesta mesma llinia, señaló que'l pasáu ""tien que tar abiertu a les investigaciones y estudios de los periodistes, escritores o historiadores porque cualquier averamientu al pasáu ye bonu y necesariu"" y mostróse contrariu a tentar de ""reprimir"" o ""inorar"" el pasáu.

LOS XUICIOS MATIZAOS DE LA HISTORIA

Igualmente, señaló que la xusticia humana nun debería tentar d'algamar ""un nivel total como si se tratare de xusticia divina"", porque la xusticia resuélvese con dos veredictos, ""culpable o inocentes"", mientres que la historia ""necesita miles de tomos pa espresar la verdá y pue tener xuicios matizaos"", añadió.

""A la escontra de la tentación del xuiciu, yo opto pola pasión de la conocencia"", afirmó Tzvetan Todorov, que nel so llibru 'El mieu a los bárbaros' reflexona sobre la identidá europea, la emigración, el diálogu intercultural y l'intentu de camuflar conflictos políticos y sociales en guerres de relixón o choque de civilizaicones.

Nesti sen, Todorov aseguró qu'en toos nós hai un ""monstruu"" dientro y alvirtió que la barbarie ta presente en cada ser humanu y en cada pueblu. ""Poro, el mio llibru nun resulta mui optimista, porque existe esi potencial de barbarie en toes partes"", añadió.

Pal premiu Príncipe d'Asturies de les Lletres 2008, la barbarie ye cualquier forma de considerar al próximu ""menos humanu"" qu'ún mesmu y afirmó que lo ""verdaderamente peligroso"" ye qu'esti principiu torne en política sistemática de los estaos como pasó en dalgunos momentos de la historia.

PELIGROSOS POPULISMOS DE DERECHES

Entrugáu pola subida de los populismos y el so peligru, el Premiu Príncipe d'Asturies argumentó que'l populismu ""peligrosu"" ye'l de dereches, porque se basa en consideranzces de ""etnia, cultura o raza"", mientres que'l populismu d'izquierda pretende ""quita-y el dineru a los ricos pa da-ylu a los probes"", apuntó.

""Agora escúchase tolo contrario, hai que quita-y el dineru a los probes pa da-ylu a los ricos"", aseguró, provocando les rises de los asistentes a la presentación del so llibru.

Poro, Todorov apostó pola ""tolerancia"" anque alvirtió de que la ""máxima tolerancia"" necesita un ""zócalu que permita condenar lo intolerable"".

Nes páxines de 'El mieu a los bárbaros', Todorov ofrez una panorámica de la realidá actual al traviés de casos concretos de conflictos internos en sociedaes europees ""como l'asesinatu de Theo Van Gogh n'Ámsterdam, les caricatures daneses de Mahoma o'l discursu del Papa en Ratisbona""."