Juan Morales (PP-Asturies) carga escontra la "miseria y la cobardía" de los que tenten de poner en duda los sos apoyos

"El candidatu a la presidencia del PP d'Asturies nel próximu Congresu Rexonal, Juan Morales, criticó güei la ""miseria"" y la ""cobardía"" de miembros del partíu, alliniaos cola candidatura d'Ovidio Sánchez, que pretendieron poner en duda la llexitimidá de les firmes presentaes d'apoyu, falando de falsificaciones ""dende l'anonimatu"" y al traviés de filtraciones na prensa rexonal.

Morales, que refugó dafechu eses acusaciones, dixo que nun va tolerar esti tipu d'inxuries sobre la so persona y poro solicitó güei al Comité Organizador del Congresu una rellación individual de les firmes que supuestamente se falsificaron, amás de les presentaes por otru candidatu y actual presidente del partíu, Ovidio Sánchez. Afirmó que ta dispuestu a demostrar, recurriendo a una notaría, la veracidá de les firmes.

Amás, tamién solicitó información sobre quién confirmó les firmes y qué calificación profesional tien. Quier ""saber si son emplegaos del partíu y personal nun procesu llimpiu"", nel que tamién personal de la so candidatura puea participar.

Morales mostróse indignáu pol fechu de que miembros del comité organizador falaren de falisifaciones, ""ensin dar la cara"", dalgo qu'atribuyó al ""mieu"" qu'existe nel sector oficial, averáu a Ovidio Sánchez, tres presentar una candidatura alternativa. ""Esti partíu tien de ser llimpiu, y los militantes tienen qu'actuar con llibertá"", esplicó nuna rueda prensa n'Uviéu, insistiendo nel so llamáu a los militantes de base, pa que tomen nota de lo que pasó y se presenten nes sos xuntes llocales ""ensin dexase presionar"".

""Si fuere verdá qu'existen falsificaciones, ¿cómo ye posible que dieren lluz verde a la mio candiatura?"", entrugóse Morales, que dixo que les acusaciones sólo busquen ""echar porquería sobre'l rival"".

Nesti puntu, mostró les sos dudes sobre la oxetividá del Comité Organizador, presidíu por Agustín Iglesias Caunedo, una persona que, según Morales, ta destinada a ocupar un cargu importante na candidatura d'Ovidio Sánchez. Esplicó que'l Comité nomólu precisamente Sánchez, na última xunta, refugando hasta la posibilidá de votar otra llista. Asina, señaló que la mayoría de los miembros del organismu son averaos a Ovidio Sánchez. ""¿Ónde ta la oxetividá y paridá d'esi comité?"", entrugóse.

Al so xuiciu, partidarios d'Ovidio Sánchez pretenden, siempre ""dende l'anonimatu"" calumnialu, dalgo que dixo que yá fizo baxo'l mesmu procedimientu con otres persones nel PP d'Asturies, como la ex diputada nacional Alicia Castro, el secretariu xeneral Reinerio Álvarez, diputaos rexonales o la presidenta del PP de Xixón, Pilar Fernández Pardo.

Dixo qu'al entamar el procesu quiso confiar en que'l ""xuegu llimpiu"" diba imperar en tol desarrollu precongresual, pero llamentó que na primer oportunidá lu calumniaren. ""Equí toi, tovía nun nació la persona que pongan en duda la mio dignidiá y el mio honor"", dixo y retó a los autores de les declaraciones a que ""dean la cara"".

Amás, fizo alusión a les declaraciones d'ayeri d'Ovidio Sánchez, que volvió a repetir que nel partíu toos son amigos, con independencia de qu'existan delles candidatures. ""Con amigos d'esta calaña, nun faen falta enemigos"", sentenció.

LLAVIANA

El candidatu tamién se refirió a dos supuestes firmes en Llaviana que, según los miembros que lo contaron a la prensa rexonal, yeren falses. Morales recordó qu'Ovidio Sánchez nació en Llaviana, conceyu que ye un ""feudu"" del candidatu 'oficialista'.

""Esto güel mui mal"", dixo Morales, y añadió que va exixir les máximes responsabilidaes sobre qué persones fueron les que provocaron esta situación. Anunció que pue haber ""grandes sorpreses"" y dixo que ye una trama ""casi mafiosa"". Amás, añadió que lo último que diba facer yera falsificar firmes, y que yera ""ridículo"" per parte de cualquier candidatu facelo nel ""feudu"" d'Ovidio Sánchez."