Argüelles alvierte a Javier Fernández sobre confundir llingua con nacionalismu

"Queremos descartar lóxicamente esa teoría", apunta'l coordinador xeneral d'IX.

Ramón Argüelles tamién quixo retrucar les pallabres del presidente Javier Fernández el martes en Madrid, na Tribuna del Fórum Europa, qu’entama Nueva Economía Fórum nel Hotel Ritz, na que venía a venceyar una llingua col nacionalismu. "Les llingües nun son armes pa llanzar, son les persones les que busquen o non los conflictos", señala nun videu grabau frente a la sede de l'Academia de la Llingua Asturiana.

"L'asturianu ye una cultura, un patrimoniu, como lo pue ser esti edificiu –en referencia al monasteriu de San Pelayo–, que tien munchos sieglos, y igual que protexemos los edificios y los monumentos, tenemos que protexer la nuesa llingua, non como una arma, sinón como un derechu de garantía y de cultura pa les xeneraciones que vengan depués", concluyó Argüelles. Izquierda Xunida (IX) ye una de trés formaciones con representación parllamentaria, llista a la que se sumó reción la FSA, que sofita la oficialidá del asturianu.