El Gobiernu asturianu y el del Estáu van firmar un conveniu de 1,7 millones pa nueves places d'educación infantil

"El Conseyeru d'Educación del Gobiernu del Principáu, José Luis Iglesias Riopedre, anunció güei que l'Executivu Rexonal va firmar nos próximos díes un conveniu cola Alministración Central pa crear nueves places n'Educación Infantil.

En total esti acuerdu va suponer una inversión de 1.733.000 euros que van aportar a partes iguales dambes alministraciones. Nesti puntu, Riopedre recordó que nestos momentos el 20 por cientu de les places ufiertaes nel Principáu son de baldre, otru 20 por cientu paguen la metá y el 60 por cientu conlleven un desembolsu pa les families d'ente 60 y 180 euros, polo que fizo insistencia en qu'esta educación ""ta mui sovencionada"".

Amás, afirmó que Xixón ye la ciudá del Principáu que más centros ufierta, un total de seis. Per otru llau, José Luis Iglesias Ripoedre, a entrugues de los periodistes, calcó na situación del Colexu Públicu Jovellanos.

Asina'l conseyeru recordó que toos yeren conscientes de que les obres nel centru diben trayer problemes, y que de fechu la primer opción que se baraxó foi unviar a los alumnos a otros colexos, cuestión que refugaron los pas y la comunidá educativa en xeneral.

Riopedre señaló qu'al final s'optó pola solución ""menos mala"" pero qu'agora ye necesario ""mirar alantre y centrase na educación de los neños"".

El conseyeru d'Educación fizo estes declaraciones nel actu d'inauguración de la Escuela Infantil de Montevil.

Sobre esti centru recordó que se trata de la sesta escuela d'estes carauterístiques en Xixón y que cuenta con 73 places polo que nestos momentos de titularidá pública existen na ciudá un total de 630."