Barbón nun ve polémica na cai sobre la oficialidá

El secretariu xeneral de la FSA asitia l'alderique namái nel terrén políticu.

La oficialidá y la candidatura socialista pa les eleiciones a la Xunta Xeneral del 2019 ocupen espaciu nos medios de comunicación estos díes, dos asuntos que p'Adrián Barbón nun son polémicos a nivel de cai.

Asina, nun mensaxe claru a Javier Fernández, confesó que sí recibió dalguna opinión crítica de ciudadanos sobre la investidura de Mariano Rajoy gracies a l'astención de la mayor parte de los diputaos del PSOE, pero non de los dos temes citaos, que nun provoquen rocea nin esmolecen a la xente.

Sobre les declaraciones del presidente Javier Fernández ayeri en Madrid sobre la oficialidá, quitó fierro a les pallabres del ex secretariu xeneral de la FSA y apuntó que, amás de la llingua asturiana, Cuadonga o los horros tamién son identitarios y non por ello provoquen un espoxigue del nacionalismu, como se pretende argumentar col tema llingüísticu.

Nesi sen, punxo l'exemplu de Galicia, onde'l Partido Popular tien mayoría absoluta, y la so política con respeuto al gallegu.