IX demanda al Gobiernu una resolución colos compromisos ambientales d'Arcelor

Ha d'afitar la cantidá, l'oxetu y el plazu de les inversiones presentaes el mes pasáu.

Izquierda Xunida (IX) esixe un pasu más al Gobiernu énte'l problema de contaminación qu'afeuta, sobre manera, al área central d'Asturies. Ovidio Zapico demandó-y esta mañana una resolución onde s'afiten les inversiones comprometíes por ArcelorMittal presentaes n'avientu na que consten l'oxetu de les mesmas, la cantidá y el calendariu concretu d'execución.

El diputáu punxo como exemplu p'amosar la necesidá del so pidimientu que nestes inversiones adelantaes anúnciase una cantidá de más de 200 millones d'euros qu'inclúi'l costu de la reconstrucción de les baterías de coque de Xixón, obra que la coalición considera que se fai por una esixencia de la llexislación y que, sicasí, s'atribúi a una meyora medioambiental. “Poner esto en papel ye'l pasu natural”, considera'l responsable de Mediu Ambiente del grupu parllamentariu d'IX.

Amás d'esta midida, la coalición demanda al Executivu de Javier Fernández un gran alcuerdu con ArcelorMittal que serviría pa poner puntu y final a una etapa na que l'Alministración y la empresa teníen una rellaición rota dafechu, según la información a la que tuvieron acceso responsables del partíu nuna reunión celebrada con direutivos de la siderurxa l'iviernu pasáu. "Creemos que debe haber una rellaición fluyida y nun se pue un día mirar pa otru llau y al otru día tar a espedientazos”, esplicó.