Primer victoria del Sporting nel Molinón

"El Sporting de Xixón ganó por 2 a 1 al Osasuna no que ye la primer victoria en casa esta temporada. Los goles de Carmelo de cabeza y Bilic de penalti fueron suficientes pa que los xixoneses sumaren los tres primeros puntos nel Molinón, algamando tamién dos victories seguides qu'asitien al equipu asturianu con seis puntos y fuera de los puestos de descensu.

Nun partíu nel que contó mas la fuerza que la técnica, los asturianos fueron quién a adelantase yá nos primeros minutos con un cabezazu de Carmelo llibre de marca y tres una salida en falsu del osasunista Ricardo, al que batió na primer llegada clara de los sportinguistes. Sicasí, los pamploneses supieron reaccionar y 3 minutos depués la defensa asturiana nun fallu de coordinación ente los centrales permitió qu'Ezquerro rematase solu delantre de Cuellar. El xuegu continuó ensin un dominador claru y con poques llegaes al área, hasta que nel minutu 39 Roversio fai un penalti claro y mui inocente sobre Bilic, teniendo amás que marchar pal vestuariu por una rigurosa roxa directa. Un minutu depués ye'l propiu Bilic el que tira'l penalti, marcando de disparu duru y secu pela escuadra.

Na segunda parte el Sporting salió a guardar el resultáu, mientres que l'Osasuna intentaba, con mas fuerza que técnica, llegar al área sportinguista. Sicasí los navarros dispusieron de dos ocasiones de gol. Nel minutu 55 Sola manda'l balón al largueru, y nel 78 foi Cuellar el que detuvo nuna intervención mui meritoria un buen disparu de falta de Masoud. El Sporting tuvo la ocasión mas clara de la segunda parte nel minutu 87 nun remate nel area de Maldonado que rechazo'l porteru Ricardo. Nos minutos finales los navarros intentaron con mas corazón que cabeza empatar el partíu, pero un Sporting bien ordenáu nos momentos xustos supo guardar la portería hasta'l final. En definitiva un partíu na mayor parte del tiempu mui poco vistosu, nel qu'un Sporting con un xuegu mas apagáu que nes xornaes anteriores supo sacar tres valiosos puntos frente a un Osasuna con pocos recursos técnicos qu'intentaba suplir con esfuerzu físicu. Lo meyor del partíu'l resultáu.

Ficha técnica
Real Sporting de Xixón: Cuéllar, Sastre, Gerard, Neru (Jorge, m. 53), Canella, Matabuena, Camacho, Luis Morán (Maldonado, m. 66), Carmelo, Diego Castro (Kike Mateo, m. 78) y Bilic.

Osasuna: Ricardo, Azpilicueta, Roversio, Flaño, Oier, Juanfran (Masoud, m. 45), Puñal, Nekounam, Ezquerro, Sola (Dady, m. 81) y Portillo (Josetxo, m. 45). Goles: 1-0, m. 11: Carmelo, 1-1, m.14: Ezquerro, 2-1, m.40: Bilic, de penalti.

Árbitru: Medina Cantalejo. Sacó tarxeta roxa directa a Roversio (m. 39) y tarxetes marielles a los sportinguistes Sastre (m. 17), Gerard (m. 28), Neru (m. 51), Carmelo (m. 63), Luis Morán (m. 71) y a los osasunistes Jorge (m. 79), Puñal (m. 81), Azpilicueta (m. 87)."