El Lealtad remonta al Caudal con un gol nel tiempu añadíu (2-1)

Los de Villaviciosa alienden con estos trés puntos, mentes que los mierenses fúndense nel pozu d'una tabla que lidera'l Sporting B.

El tantu de Camporro de penalti, nuna xugada mui protestada pol equipu llocal, nel minutu 61, fixo que los de Roberto Aguirre perdieran el rumbu del partíu, reacionando 15 minutos depués gracies a un tantu de falta direuta d'Álex Blanco. Esti gol cambió'l panorama en Les Caleyes nun choque vital pa los dos equipos poles urxencies clasificatories de dambos, en puestos de descensu.

El Caudal quedaría con 10 nel minutu 88 pola mui protestada tamién espulsión de Polaco por doble amonestación. Nun sería la última xugada polémica del choque, yá que nel tiempu añadíu'l refuerciu Chema Moreno, debutante ayeri, anotaba'l definitivu 2-1 pal Lealtad nuna xugada onde los mierense pidieron fuera de xuegu.

El conxuntu maliayu consigue asina 3 puntos vitales que lu mantienen nel puestu decimosétimu con 18 puntos, recortando 3 puntos al Vitoria, equipu qu'agora ocupa la plaza d'eliminatoria pol descensu. La salvación márcala'l Real Unión, con 24, 11 más que los que tien el Caudal, que sigue colista con 13.

L'emocionante choque ente los dos conxuntos asturianos pudo vese y sentise n'asturianu per RTPA. Na televisión la narración foi de Fernando García de Dios, con Nacio González a los comentarios, mentes que na radio pública retresmitió'l choque Miguel Fernandi.

El filial roxiblancu, más líder

El trunfu del Sporting B, con tantu de Cristian Salvador, en Mareo sobre'l Leoia, xunío a la derrota del Mirándes por 0-1 col Racing, dexen al filial roxiblancu entovía más líder. Los de José Alberto López Menéndez sumen 48 puntos, 5 más que los burgaleses y santanderinos, igualaos a 43.

Ocupa la última plaza pa clasificase a les eliminatories pol ascensu a Segunda División A la Real Sociedad B con 38, un puntu más que'l Burgos CF.