Garzón declárase competente pa investigar los crimes cometíos na Guerra Civil y el Franquismu

"El xuez de l'Audiencia Nacional Baltasar Garzón declaróse güei competente pa investigar los crimes escontra la humanidá cometíos demientres la Guerra Civil y el Franquismu por entender que se produxo un delitu permanente de detención illegal ensin dar razón de paraderu qu'encaxa, según el maxistráu, nel contestu de crimes escontra la Humanidá.

Nun autu de 68 páxines, fechu públicu güei, el xuez declara la estinción d'esta responsabilidá pola muerte de 35 altos mandos del réxime franquista, entamando pol propiu Franco y incluyendo xenerales como Mola, Yagüe o Queipo de Llano. Pa confirmar la so muerte, en vista d'acusalos del citáu delitu, Garzón pide los certificaos de muerte correspondientes.

El maxistráu reclama tamién al Ministeriu del Interior los datos qu'identifiquen al máximu númberu posible de dirixentes de Falange Española ente'l 17 de xunetu de 1936 hasta'l 31 d'avientu de 1951 pa qu'una vez identificaos acuerde ""lo necesario sobre l'acusación y estinción en casu de muerte de la so responsabilidá penal"".

Garzón argumenta que'l delitu de desapaiciones permanez nel tiempu y sigue existiendo a día de güei si nun se dio razón del paraderu. Ye competencia de l'Audiencia Nacional, dao que'l xuez considera que too entamó col llevantamientu nacional --que diba encaxar nel delitu escontra altos organismos de la nación-- delitu que nun prescribió porque ta conexu col de les desapaiciones forzoses, qu'arrastra al otru.

ABERTURA DE LA FOSA DE LORCA

L'instructora autoriza amás nel so autu'l desentierru de los restos de 19 foses comunes de toa España, incluyía aquélla onde ta enterráu'l poeta granadín Federico García Lorca.

Crea un grupu de siete espertos --cinco d'ellos que van proponer les partes, dos el Xulgáu y otru de Policía Xudicial-- con fin de desarrollar los llabores de busca y llocalización de los cuerpos de los desapaecíos. Éstos van tener qu'analizar el númberu y llugar d'identificación de les víctimes y presentar un informe col númberu total de muertos.

Les denuncies presentáronles dende xunetu del 2007 22 asociaciones de memoria histórica y diez particulares que soliciten una investigación sobre les desapaiciones, 'saques', asesinatos, tortures y exilios forzosos que se cometieron de magar 1936 y polos que, al so xuiciu, debería responder l'Estáu dientro del marcu actual de les obligaciones de reparación pola violación del Derechu Internacional.

Garzón pidió'l pasáu 1 de setiembre a instituciones como'l Valle de los Caídos, la Conferencia Episcopal Española (CEE), el Centru Documental de Memoria Histórica y a los alcaldes de Madrid, Sevilla, Granada y Córdoba, la ellaboración de llistes de víctimes y l'aportación de datos sobre los desapaecíos demientres la Guerra Civil.

Dempués, amplió la información a los tribunales republicanos creaos na contienda demientres la defensa de Madrid y solicitó a la Conferencia Episcopal Española (CEE) qu'encamentare a los obispos a que-y unviaren la información solicitada.

La Fiscalía, pela so parte, solicitó en febreru la non almisión a trámite de la querella, por considerar que los fechos prescribieron en 1977, cola aprobación de la Llei d'Amnistía, y que nel momentu en que se produxeron yeren delitos comunes d'asesinatu, detención illegal o lesiones, según el Códigu Penal de la República.

D'igual manera, el Ministeriu Públicu caltién que la competencia nel presente casu nun correspuende a l'Audiencia Nacional puesto que, al so entender, los crimes deberíen ser persiguíos polos xulgaos de los llugares nos que se cometieron los fechos."