Areces estima que'l Principáu va poder mercar al añu 1.000 viviendes llibres pa reactivar el mercáu

"El presidente del Principáu d'Asturies, Vicente Álvarez Areces, confirmó güei un paquete de midíes que va incluyir nel proyeutu de presupuestos pal 2009 col oxetivu de reactivar la compra venta de viviendes. Les midíes pasen pela compra per parte de la sociedá rexonal Vipasa d'hasta unes 1.000 viviendes llibres pa la so reorientación como vivienda protexida y la creación d'un fondu de garantía pa operaciones hipotecaries que diba permitir cubrir hasta un 30 por cientu.

Areces realizó estes declaraciones nun almuerzu informativu organizáu pol diariu económicu Cinco Días con motivu del so 30º Aniversariu que contó cola asistencia de políticos y empresarios asturianos.

El xefe del Executivu autonómicu aseguró que'l fondu que quier crear el Principáu pa viviendes protexíes o vivienda llibre que quiera adautase va permitir ""dar garantíes al promotor y comprador"" pa cubrir la diferencia ente la hipoteca y el preciu de compraventa. Esta garantía va tener, de primeres, un periodu de tres años, col oxetivu de ""dar oxíxenu"" tanto a los promotores como a los compradores, puesto que, según Areces, nel Principáu existe tovía demanda de vivienda protexida.

Pela so parte, l'Alministración autonómica va asegurar coles entidaes bancaries el peligru del fondu que va tar ""acotáu"", según avanzó'l responsable autonómicu.

En cuanto a la promoción de vivienda, Areces aeguró que'l Principáu estima poder caltener un ritmu de construcción de 6.000 viviendes protexíes al añu ""lo que va permitir caltener una gran parte del emplegu"" del sector. En cuanto al stock existente, aseguró que ""nun resulta preocupante"" al nun existir n'Asturies grandes urbanizaciones paralizaes como ""pasó n'otres comunidaes autónomes"".

Sicasí, plantegó como otra de les midíes la posibilidá de mercar vivienda llibre pa tresformar en vivienda protexida. Nesti sen, Areces cifró la posibilidá de que'l Principáu mercare hasta 1.000 viviendes al añu con esta finalidá. Mediante esta fórmula dixo, ""podíemos tener nel mercáu al añu cientos o hasta más de mil viviendes llibres que se puen reorientar"". Destacó, de la mesma manera, l'interés qu'esta midida pue provocar ente les entidaes financieres.

NEGOCIACIÓN CON IX

A Vicente Álvarez Areces tamién-y entrugaron pol plazu de 15 díes que la Federación Socialista Asturiana (FSA-PSOE) fixó p'algamar un acuerdu con Izquierda Xunida que favoreza la gobernabilidá. Nesti sen, aseguró que la ""FSA y IX consideren que ye razonable esi plazu"" y aseguró opinar ""lo mesmo""."