Les patronales hosteleres ven "desproporcionaes" les demandes sindicales d'aumentu de salariu y dos díes de descansu

"Les patronales del sector de la hostelería, Unión Hotelera, Hostelería d'Asturies y Hostelería de Xixón tacharon güei de ""desproporcionaes"" les demandes sindicales na negociación del conveniu colectivu, que planteguen un aumentu salarial, l'establecimientu de dos díes de descansu a la selmana en llugar del ún y un mediu actual, y el caltenimientu del 100% de la paga por baxa llaboral dende'l primer día. Los empresarios aluden al aumentu de costes y la perda d'ingresos como motivos qu'impiden asumir pidimientos talos.

Al traviés d'un comunicáu, les tres patronales respondieron a la declaración sindical qu'esta mañana realizaron Comisiones Obreres y UXT anunciando la rotura de la negociación, pola postura de la patronal, a la qu'acusaron de nun tar dispuesta a ceder nestos aspeutos.

Agora son les patronales les que llancen la mesma acusación a los sindicatos, porque son ellos ""los que caltienen postures inamovibles y se nieguen a ceder nes sos posiciones"". En consecuencia, los acusen de ""irresponsabilidá"" y de poner en peligru ""más de 2.000 puestos de trabayu"".

El comunicáu esplica que la subida salarial demandada asciende a un 18 por cientu sobre'l conveniu del 2005 y que representa un aumentu de los costes por trabayador cercanu al 20 por cientu"". ""Nun escenariu económicu marcáu pola perda d'ingresos y la subida de costes nel sector turísticu, les patronales hoteleres venlo imposible d'asumir y proponen, faciendo un enorme esfuerzu, un 3,5% que ye l'IPC que dende'l Gobiernu central s'estima pal pieslle del añu"". Unión Hotelera, Hostelería d'Asturies y Hostelería de Xixón mostráronse ""conscientes de les dificultaes a les que s'enfrenten los trabayadores nun contestu de crisis económica, pero recuerden que tampoco los empresarios tán atravesando un bon momentu"".

En cuanto a los dos díes de descansu, señalaron que la so xeneralización ""pue derivar nuna perda de rentabilidá de les empreses más modestes y que cuenten con menos trabayadores coles consecuencies qu'ello pue suponer en términos d'emplegu"". Les patronales apuesten por ""crear gradualmente la obligatoriedá de descansar dos díes en función del númberu de trabayadores de la empresa, siendo la previsión que pal 2012 tol sector puea adautase a la nueva situación ensin qu'ello suponga una reducción de la so actividá"".

LLUCHA ESCONTRA L'ABSENTISMU LLABORAL

A lo cabero, los sindicatos acusaben a la patronal de pretender eliminar la cláusula del actual conveniu que cubre'l 100% de la prestación por baxa llaboral. Según la versión de les patronales, tratábase d'una ""midida destinada a combatir l'absentismu llaboral, que tan altos índices collecha nel sector pa perxuiciu del empresariáu. Nesti sen, los patronos punxeron enriba la mesa una propuesta pa controlar eses ausencies inxustificaes al traviés del salariu que ganen los trabayadores demientres los primeros díes de baxa"". Les tres centrales aseguren que ye ""una propuesta pa discutise y qu'en nada busca rebaxar los derechos llaborales, sinón dexar de facer rentables determinaes conductes qu'en nada beneficien nin a la empresa nin a los trabayadores que cumplen coles sos obligaciones"".

Los empresarios siguen, sicasí, ""apellando al diálogu y ofreciendo la mano a les organizaciones sindicales a fin de recuperar lo primero posible la negociación d'un conveniu que lleva un retrasu que nun fai sinón perxudicar los intereses de toles partes""."