Andecha Astur lleva a la oficina antifraude de la UE l'escesu de coste d'El Musel (Xixón)

"Una delegación de la formación política Andecha Astur, acompañada pol eurodiputáu d'Europa de los Pueblos, Mikel Irujo, va presentar mañana ante la OLAF (Oficina Antifraude de la Unión Europea) una denuncia polos fechos asocedíos nes obres d'ampliación del puertu d'El Musel, Xixón.

P'Andecha Astur resulta evidente que l'intentu del Principáu de ""engañar"" a la Unión Europea pa qu'asuma'l ""inxustificable"" escesu de coste d'El Musel, presentándolu como una ""inexistente"" segunda fase nes obres d'ampliación del mesmu, ""entra dientro de lo que ta consideráu fraude y entiende que la UE nun sólo actuó correctamente negándose a aceptar l'engañu y nun concediendo dichos fondos, sinón que tien de continuar les sos actuaciones nel terrenu llegal determinando responsabilidaes y actuando en consecuencia"", señalaron dende Andecha Astur al traviés d'una nota prensa.

Na denuncia presentada por Andecha Astur nun sólo se señala como responsable al Principáu, sinón tamién a la UTE axudicataria de les obres d'ampliación del puertu pa determinar si'l fechu de xenerar de manera ""consciente y voluntaria"" tan multimillonariu escesu de coste escuende tamién intereses ""fraudulentos"".

De de la mesma manera, la denuncia calca nel robu de 600 tonelaes de fierru y aceru per parte de responsables de les obres y la consiguiente reducción de les calidaes de los bloques de formigón, que nun diben llevar les cantidaes de fierru y aceru establecíes, ""dalgo que, independientemente de los problemes de seguridá que puea provocar, atenta directamente escontra les condiciones de calidá en base a les cuales l'ampliación d'El Musel algamó la financiación europea"".

Per otra parte, la delegación d'Andecha Astur, encabezada por Pablo Ríos, responsable de Rellaciones Esteriores de la organización va aprovechar pa facer una puesta al día col eurodiputáu d'Europa de los Pueblos, Mikel Irujo (EA) de los temes que nesti momentu tán llevándose ante la Unión (Zalia, desmonte del Altu Aboño, o les Redes d'Alta Tensión)."