El miércoles fina'l plazu p'apuntase al taller d'asturianu nel Atenéu Obreru de Villaviciosa

Ta empobináu a toda persona interesada n’ampliar los sos conocimientos sobre l'idioma independientemente del so nivel.

Esti miércoles, a les 18 hores, va comenzar el taller d'asturianu qu'entama'l Serviciu de Normalización Llingüística de la 'Comarca de la Sidra' en collaboración col Atenéu Obreru de Villaviciosa. Ye esti día tamién el caberu pa formalizar la matrícula al traviés de los correos electrónicos normastur@lacomarcadelasidra.com o secretaria@ateneovillaviciosa.es, el teléfonu 985.89.02.75 o la páxina de Facebook del SNL.

Les clases van tener llugar tolos miércoles n'horariu de 18 a 20.30 hores, con una llargor total de 30 hores y final el 17 de marzu. Les alumnes y alumnos, más allá del so nivel, van poder afondar nos sos conocimientos d'asturianu tanto a nivel escritu como oral.

Na primer parte, partiendo de les producciones del alumnáu, van correxise testos y van repasase les normes ortográfiques y gramaticales, amás d’ampliar los recursos sintácticos y de vocabulariu. Mentes, na segunda, va facese por quitar mieos a la hora d’intentar enfrentase n’asturianu a les situaciones comunicatives más diverses, iguando errores y buscando un modelu natural y prestosu de llingua falada.

D'igual forma, el taller va centrase nes producciones culturales actuales en llingua asturiana, asina como en tolos elementos sociollingüísticos que condicionen el so desarrollu y evolución, historicamente y na actualidá.