El Congresu almite a trámite la iniciativa d'Izquierda Xunida escontra la privatización de la sanidá

"La mesa del Congresu acordó güei, col únicu votu a la escontra del PP, almitir a trámite la proposición non de llei d'Izquierda Xunida que perisgue que la cámara censure la privatización de la sanidá pública en Madrid y otres comunidaes, según informaron a Europa Press fontes parlamentaries.

Esta propuesta ye una reformulación de la iniciativa orixinal, na que'l partíu que coordina Gaspar Llamazares reivindicaba que'l Congresu refugare espresamente la privatización sanitaria na Comunidá de Madrid.

Los representantes 'populares' na Mesa Xeneral de la Cámara Baxa xustificaron la so oposición a esta iniciativa argumentando que les Cortes Xenerales nun tán pa controlar a una comunidá autónoma que tien competencies sobre la sanidá.

Poro, la propuesta quedó conxelada a la espera de que'l presidente de la Cámara, José bono, entrugare a la coalición sobre cuál ye la intención de la mesma, una cuestión qu'a lo cabero resolvióse al traviés d'una reformulación del testu de primeres pa tornalu en xeneral.

IX TAMIÉN QUIER IMPLICAR AL DEFENSOR DEL PUEBLU

Na so iniciativa, Llamazares pide al Gobiernu que, nel marcu de les sos competencies como garante del serviciu públicu de salú, estudie la ""incompatibilidá"" cola Constitución y cola Llei Xeneral de Sanidá que supón la concesión de la xestión d'hospitales y centros de salú d'una comunidá a empreses privaes.

El reclamu de Llamazares lu llevó hasta solicitar al Defensor del Pueblu, Enrique Múgica, qu'estudie la posible incompatibilidá de la xeneralización de los sistemes de xestión privada na sanidá pública y la Constitución, y que, nel so casu, presente un recursu ante'l Tribunal Constitucional."