Ornosa: “Si l’estatutu s’apreba tal y como se negoció hasta agora al día siguiente tendríemos que pidir una nueva reforma”

"Depués de la manifestación del pasáu sábadu 4 d'ochobre, Asturies.com entrevistó a Fernando Ornosa, portavoz del Conceyu Abiertu pola Oficialidá. Nesta entrevista Ornosa fai una valoración de les últimes acciones del CAO y esplica les que vendrán, amás d'analizar l'actual coyuntura no que cinca a la reforma del estatutu y el posicionamientu de los dos partíos mayoritarios nesti procesu, el PSOE y el PP.

¿Cuála ye la valoración que'l CAO fai de la última manifestación?

La valoración ye mui positiva nun momentu fácil pa la desmovilización al haber un parón na reforma estatutaria. Sicasí decidimos mantener la convocatoria de la manifestación y el sábadu pasáu hubo munchos miles d'asturianos y asturianes que se manifestaron pola oficialidá y eso la verdá ye qu'anima porque vemos que'l movimientu de reivindicación llingüística ta sollerte, ta na cai, ta vivu. Vemos que la xente nun va dexar que se roble per parte del PSOE y el PP una reforma estatutaria ensin oficialidá. Énte esti parón

¿Qué futuru albidra'l CAO pa los próximos meses nel procesu de reforma estatutaria?

Nesti momentu ye mui dificil facer valoraciones de en qué va derivar esti procesu porque los partíos mayoritarios n'Asturies tan constantemente xugando en clave interna. Sabemos que nesti momentu va haber un congresu del PP que condiciona enforma el que s'abra un procesu de diálogu enantes de fines de payares. Depués lleguen les navidaes. Lo que quier dicir que l'escenariu nel que nos movemos, a nun ser que cambien muncho les coses, asitianos yá nos primeros meses del 2009 y ehí ye posible que s'abra otra vegada el procesu de reforma, o incluso puede haber otres dos posibilidaes: que la reforma quede pa la siguiente lexislatura por alcuerdu de los partíos mayoritarios o qu'incluso decidan nun facer reforma estatutaria. Contemplamos por tanto tres posibilidaes: una a curtiu plazu, otra a mediu-llargu plazu y una tercera que dexaría a Asturies ensin reforma estatutaria.

Viendo'l desarrollu de les negociaciones y el posterior alcuerdu na cuestión llingüística ente'l PSOE y PP ¿Val más que nun se reforme l'estatutu a que salga un l'articulu cuartu nos términos yá pautaos ente les fuerces mayoritaries?

La verdá ye que si. La reforma tal y como se planteó hasta agora ponnos nun escenariu que nos obligaría a pidir una nueva reforma del estatutu al día siguiente qu'acabara l'actual. Esti parón en principio ye meyor nel sentíu de que nos abre les puertes pa siguir revindicando la oficialidá, pero tamién hai que recordar a tolos partíos que la llingua asturiana ta morriendo, que l'asturianu podría perdese en dos xeneraciones, que ta amenazada y que ta Carta Europea de les Llingües Rexonales como una llingua en peligru de desaparición. Hai que recorda-yos que la oficialidá ye una asignatura pendiente pero que l'hai que superar nun curtiu plazu porque tamos perdiendo falantes día tres día y la supervivencia del idioma va ser cada vez mas complicada. Entós el parón viennos bien pero viennos bien si cuando se retome al negociación logramos ser quién a algamar la oficialidá.

En referencia a esa clave interna de los partíos mayoritarios ¿esperase dende'l CAO algún cambiu nes mayoríes internes del PSOE y el PP que favoreza'l reconocimientu de la oficialidá?

En principiu'l congresu del PP ye mui importante pa ver si hai esos cambios. Dependiendo de les posiciones que s'adopten, dende'l CAO, igual que fixo nel congresu de la FSA del mes de xunetu, vamos intentar tar presentes nesi congresu pa ufrir una redacción del artículu cuartu y reivindicar dientro del propiu congresu que se mantengan aquelles posiciones que paecíen que dende los últimos dos años defendíen d'apertura hacia la oficialidá. Vamos intentar que se vuelva a retomar esi posicionamientu.

¿Cuáles van ser les próximes acciones que va facer el CAO?

Lo que vamos desarrollar nos próximos meses ye la campaña ""doi la cara pola oficialidá"". Vamos intentar pega-y un reblagu. Nesti momentu ye una campaña a tres bandes. Per un llau les semeyes, de les que yá hai mas de 7.000 y vamos intentar qu'haya munches mas. Per otru yá tenemos grabaos en formatu documental a muncha xente conocío como Víctor Manuel, Hevia, Corín Tellado, Carmen Gómez Ojea o Chechu Rubiera y vamos intentar que sía muncha mas xente conocío la que sofite esta campaña. Y tamién vamos facer pequeños spots asemeyaos a los qu s'usaron pa dar anuncia la manifestación del 4 d'ochobre."