El COFPA afirma que’l Gobiernu somete “a censura política” a les Brigaes d’Investigación de Quemes

El cambiu del modelu organizativu de les Brigaes d’Investigación de Quemes Forestales del Principáu d’Asturies (BRIPAS)  ye pal Conceyu por Otra Función Pública n’Asturies (COFPA) un movimiento de “censura política”. Pasa a depender del xerente del SEPA.

La modificación de la rellación de puestos de trabayu aprobada pol Gobiernu n’avientu fai que’l BRIPAS dexe de tar baxo’l mandu d’un funcionariu públicu de carrera, el xefe del serviciu d’Interior de la Direición Xeneral de Xusticia y Interior, pa pasar al del organismu autónomu Serviciu d’Emerxencies del Principáu d’Asturies (SEPA), en concreto’l so xerente, que va encargase de la revisión y tramitación que proceda de los informes de les BRIPAS, “esto ye, el control y censura política de la so actividá”. La intención d’esti cambiu, pal COFPA, ye “minar la so independencia funcional”, recordando que’l cargu de xerente del BRIPAS ta “designáu a deu”.

Dende esti coleutivu consideren grave esta decisión al entender que’l funcionamientu de les Brigaes yera bonu, pa lo que fai referencia a les consideraciones y pidimientos de la Fiscalía d’Asturies y al fechu de que el númberu de sentencies condenatories nos tribunales “supón el mayor porcentaxe de condenes en rellaición col númberu de quemes investigaes en tol territoriu” estatal. Inclusive, calca en como la propia Fiscalía llamentaba’l retrasu col que llegaben n’ocasiones los informes “mui posiblemente por mor del ‘trámite previo’ de tener que ser remitíos al traviés de la direición xeneral, siendo más práutico y deseable una remisión direuta a la Fiscalía cuando tuvieren finaos polos investigadores”, polo que’l COFPA censura esta modificación col que’l “Gobiernu del Sr. Fernández intensifica los controles y censures previes de los informes”.

D’igual forma, apunta que la modificación organizativa supón una “irregularidá grave al cambiar el Gobiernu del Principáu l’adscripción de los funcionarios integrantes de les BRIPAS vulnerando la so propia normativa, qu’esixe l’aprobación previa d’una resolución na que s’afite la so organización, réxime xurídicu y funcionamientu, garantizando la independencia de les investigaciones”.