Mapi Quintana, el jazz con acentu asturianu

"Esti domingu toca n’Asturies una de les propuestes musicales más interesantes que tien a la música asturiana como ún de los sos exes principales. La mezconlancia ente jazz y música asturiana, unes veces más tradicional, otres más folk, ye’l conceptu que trae la cantante asturiana Mapi Quintana, que cola xunta la so banda, van tocar esti domingu 13 de setiembre en La Pola L.lena.

Mapi Quintana pertenez a una fornada d’escelentes músicos asturianos de jazz que son el mascarón de proa d’esta música n’Asturies. Munchos d’ellos, ente los que tán nomes como Dudu Puente, Felix Morales, Horacio A. García, José Ramón Feito, Carlos Pizarro o David Casillas, lleven años demostrando que dende esti país puede facese una propuesta jazzera interesante, anque les más de les veces tuvieron o tienen que colar d’Asturies pa completar los sos estudios o buscase un futuru llaboral. Esti ye’l casu de Mapi Quintana, que xunta con otros músicos, constituyeron una especie de colonia de músicos de jazz asturianos pela tierra de los tulipanes.

Ellí ye onde Mapi completó los estudios, faciendo evolucionar la so prestosa voz. Pero arriendes d’estudiar, Mapi tamién desenvolvió -y desenvuelve- n’Holanda dellos proyectos musicales, adaptando la so voz a distintos rexistros interpretativos. Ún d’esos proyectos musicales ye’l que se va poder ver el próximu domingu en L.lena. Ésti consiste n’establecer una diálogu ente la música tradicional asturiana y el jazz. Nesti diálogu la voz cantante, nunca meyor dicho, va llevala Mapi Quintana interpretando temes tradicionales xunta con otros de composición propia. Al llau d'ella va tar otru de los aspectos más interesantes d’esti proyectu musical, una banda de músicos de diferentes procedencies faciendo la base musical que va da-y un toque ente folk y jazz a la voz de Mapi.

En L.lena Mapi Quintana va facer dellos cantares del que va ser el so próximu discu, que va entitulase ""El Sonar de Les Semeyes"" una “música inspirada na xente y los sitios qu’echo en falta tando nel estranxeru"". En pallabres de la propia Mapi la so música ""Ta compuesta utilizando sonoridaes y elementos de la música asturiana”. El conciertu va ser a les 20:00 hores nel Teatru Vital Aza esti domingu 12."