Air Berlín nun descarta cubrir la ruta Asturies-Madrid ante "l'abertura de güecos nel mercáu"

"El director d'Air Berlín pa España y Portugal, Pablo Caspers, afirmó güei que la compañía ta estudiando crear nueves rutes n'España, ente elles la d'Asturies con Madrid, ante ""l'abertura de güecos nel mercáu cola marcha d'otres aerollinies"". Caspers aseguró que'l Gobiernu del Principáu plantegó-y esta posibilidá ""pero de momentu nun hai nenguna noticia"".

Caspers manifestábase asina ante les entrugues de los medios de comunicación tres la presentación de los datos de la temporada de la compañía. El director pa España y Portugal afirmó que pa que la llinia seya rentable un avión tien de tar volando ente nueve y doce hores, polo qu'enantes de tomar cualquier decisión ye mui importante, ""facer númberos y ver si salen les cuentes"".

Afirmó que la ruta Asturies-Madrid nun diba tener por qué ser vía Palma Mallorca y recordó que la compañía yá saca rutes, como la de Valencia-Palma.

Sobre esti asuntu, la directora de Turismu, Elisa Llaneza, afirmó que ""siempre foi una posibilidá negociar y proponer la ruta Asturies-Madrid, non sólo a Air Berlin, sinón tamién a otres compañíes"". Llaneza manifestó que ye ""evidente"" que cola marcha d'EasyJet quedó un güecu nesa ruta y añadió que ""ye llóxico qu'Air Berlín y otres compañíes evalúen les posibilidaes de cubrila"".

Pablo Caspers refirióse tamién a la posibilidá de desarrollar xunto al Principáu campañes de promoción turística y destacó que pel momentu sólo'l 10% de los pasaxeros que lleguen a Asturies con Air Berlín son turistes estranxeros.

Per otra parte, yá nel análisis de los resultaos de la compañía n'Asturies, el director pa España y Portugal indicó que'l númberu de viaxeros creció un 11,7% de xineru a xunetu, hasta algamar los 54.700, un incrementu superior al rexistráu n'España, que foi del 8,7%.

Pa la nueva temporada qu'entama nesti mes d'ochobre, Air Berlín ofrez dende Asturies una conexón diaria, vía Palma Mallorca, con Alicante y con Valencia. A elles se sumen les conexones yá existentes con Sevilla y con Salzburgo."