El primer tren de viaxeros a gas natural llicuáu del mundu percuerre víes asturianes: de Mieres a Figareo

Un tren de Renfe, el primeru a gas natural llicuáu d'Europa y de viaxeros a nivel mundial, percorrió a mou de prueba un tramu de 5 quilómetros ente les estaciones de Mieres y Figareo. La intención yera analizar les potenciales ventayes ambientales y económiques que pue aportar esti combustible en llinies non lletrificaes.

El ministru d’Enerxía, Turismu y Axenda Dixital, Álvaro Nadal, y el ministru de Fomentu, Íñigo de la Serna, desplazáronse ayeri a Asturies p’asistir a la primer prueba del proyeutu desendolcáu por Renfe xunto con Gas Natural Fenosa y Enagás, en collaboración con Bureau Veritas. El prototipu de tren autopropulsáu con gas natural llicuáu (GNL) va prestar serviciu nos cuatro meses próximos na llinia de Cercaníes d’Ancho Métricu F8 ente Baíña y Coḷḷanzo.

La prueba resultó positiva, algamando una velocidá punta de 35 quilómetros per hora –el tren circuló con mayor pesu del previsto pola asisentencia d’autoridaes y medios de comunicación–. L’oxetivu con esti tren ye analizar les potenciales ventayes ambientales y económiques que pue aportar esti combustible en llinies non lletrificaes dientro d’un proyeutu que s’enmarca nel plan de descarbonización y eficiencia enerxética del sector ferroviario y de la estratexa d’impulsu del Vehículo con Enerxíes Alternatives nel Estáu.

Según datos del Ministeriu d’Enerxía, el ferrocarril consume práuticamente la metá de toda la lletricidá utilizada nel sector del tresporte nel Estáu (el 45,8 por cientu frente al 20,1 por cientu de la carretera). Amás de continuar cola lletrificación del ferrocarril, dende’l Gobiernu estal considérase conveniente apostar por alternatives, col gas natural llicuáu “como’l combustible alternativu con meyores condiciones pa protagonizar una transición segura y eficiente en curtiu plazu por motivos de disponibilidá, preciu y estabilidá”.

Na semeya, De la Serna y Nadal mientres el trayeutu de prueba.