Carreño entama un programa dedicáu a Antón de Marirreguera cola intención de “crear un polu de creatividá cultural”

Esti xueves echa a andar en Carreño’l Programa Cultural Antón de Marirreguera col oxetivu de recordar la figura del poeta, dignificar l’asturianu y “crear un polu de creatividá cultural” nel conceyu con repercusión en toda Asturies. Un actu en Llorgozana va abrir la XXXIX Selmana de les Lletres Asturianes el 27 d'abril.

Esta iniciativa naz del Conceyu de Carreño y cuenta cola collaboración de la Direición Xeneral de Planificación Llingüística y Normalización, l’Academia de la Llingua Asturiana (ALLA), l’Asociación d’Escritores d’Asturies y l’Asociación de Llibreríes del Principáu d’Asturies. Baxo’l sotítulu de ‘Carreño, ñeru de la pluma n’asturianu, va consistir nuna serie d’actividaes sobre la poesía de dellos autores consagraos, una conferencia sobre Antón de Marirreguera a cargu de Xandru Martino, prevista pal 5 d’abril, y conciertos en parroquies del conceyu, amás delles eventos al con motivu de la XXXIX Selmana de les Lletres Asturianes.

Nacíu en Llorgozana al rodiu del 1605, l’autor de Carreño ye’l primer poeta n’asturianu conocíu de la historia, siendo el ‘Pleitu entre Oviedo y Mérida: Sobre la posesión de las cenizas de Santa Eulalia’ el primer poema nel nuesu idioma que llegó a los nuesos tiempos. Una figura clave na lliteratura asturiana que dende’l Conceyu consideren necesariu potenciar y, al empar, aprovechar “pa protexer y dignificar la llingua asturiana y la diversidá llingüística”.

“Yera un poeta rural, un cura qu’escribía coses cultes y falaba de too, pero tamién pa la xente del campu, con apegu a la tierra y a los raigaños”, recuerden dende la organización d’esti Programa Cultural, que va a echar a andar esti xueves na Biblioteca Pública Municipal Carlos González Posada con un actu nel que se va descubrir una placa n’alcordanza del autor nun aula del centru. Va ser a les 12.30 hores y va contar con una actuación del Grupu de Vientu de Metal de la Escuela de Música Miguel Barrosa.

Esti eventu ye’l primeru del Programa Cultural Antón de Marirreguera, anque ayeri se celebró un actu n’Uviéu nel que tuvo presente l’alcadesa de Carreño, Amelia Fernández; el direutor xeneral de Planificación Llingüística y Normalización, Fernando Padilla; el secretariu de l’ALLA, Xosé Ramón Iglesias Cueva; y la presidenta de l’Asociación d’Escritores d’Asturies, María Esther García López, ente otros, qu’empoderaron la figura del autor y destacaron el potencial de la iniciativa. La siguiente actividá va tener llugar el xueves 18, a les 19.30 hores nel Muséu Antón, actu que va centrase en ‘La poesía de Xurde Fernández’, con Pablo Texón como presentador, y na que la Escuela de Música Miguel Barrosa tamién va intervenir.

Ente xineru y abril va haber otros cinco sesión del ciclu ‘Poétiques’ cola fin de conocer la poesía que s’ellabora anguaño nel país, cola participación de Roberto González-Quevedo (15 de febreru), Lourdes Álvarez (8 de marzu), Marta Mori (5 d’abril) y Xuan Bello (27 d’abril). Pal 28 d’abril, mentes, va completase esta iniciativa con una xornada dedicada a los creadores mozos.

Conciertos barrocos y concursos lliterarios

Baxo’l nome de ‘Sones del barrocu: la música qu’amó Antón de Marirreguera’ va entamase tamién una serie de conciertos nes parroquies rurarles del conceyu. El Santuariu de Los Remedios de Quimarán va acoyer el primeru, el 8 de febreru a les 17.45 hores, dedicáu a les voces del Barrocu, cola participación del Grupu de Téunica Vocal de la Escuela de Música Miguel Barrosa baxo la direición de David Colado y con Ángeles y María Jesús Cuevas, al pianu. Albandi, Llogorzana y la fábrica antigua d’Ortiz van ser sede del restu de sesiones d’esti ciclu.

Tamién van entamase dos concursos lliterarios pa fomentar la creación nel nuesu idioma. Ún ta empobináu a escritores mozos, d’hasta 35 años, entituláu Ensalmos d’Anton de Marirreguera, mentes que’l segundu ye pa centros escolares de toda Asturies de nome ‘Dichos y creatures d’Anton de Marirreguera’, cola temática, nesti primer añu, de la tradición oral.

Actu inaugural de la Selmana de les Lletres Asturianes

La primer edición del Programa Cultural Antón de Marirreguera va allargase hasta la XXXIX Selmana de les Lletres Asturianes y va abellugar la inauguración oficial de la mesma. Va ser el 27 d’abril cola actividá ‘Alba de les Lletres Asturianes’, “un actu bien cenciellu, como cenciellu yera’l poeta, y venceyáu a la tierra” que va consistir na llectura al alborada d’un poerma d’Antón de Marirreguera por parte d’ún de los ganadores de los concursos lliterarios col acompañamientu d’una gaita o una flauta.

La intención de la organización ye qu’esti actu sía siempre’l que sirva p’abrir la gran fiesta de les nueses lletres, que va contar esti añu con numberoses actividaes en Carreño na so primer fin de selmana. Asina, va celebrase una Feria del Llibru n’Asturianu na fábrica antigua d’Ortiz,  una función con monologuistes, un conciertu de cantautores y una xornada gastrónomica na hostelería llocal.

Dende’l Conceyu de Carreño llamen a tola ciudadanía del conceyu y d’Asturies a participar col oxetivu de consolidar esti programa de cara a años próximos y “crear un polu de creatividá cultural” con repercusión en tol país. “El proyeutu queremos que sía lo más integrador posible y que naide qu’apueste pol cuidáu del asturianu tea escluyíu. Poro,  cualquier aportación ye bienvenida”, añaden dende la organización.