El PP ofrez al PSOE "diálogu" p'aprobar unos presupuestos rexonales que reduzan les consecuencies de la crisis

"El presidente del PP d'Asturies, Ovidio Sánchez, fizo güei una ufierta al Gobiernu, a la FSA-PSOE y al Grupu Socialista pa ""dialogar"" de cara a l'aprobación d'unos presupuestos rexonales pal 2009 que contribuyan a rebaxar les consecuencies de la crisis económica. Trataríase d'unes conversaciones ""ensin nenguna condición previa"", según el PP.

Sánchez llanzó esa ufierta a los socialistes nuna rueda prensa ofrecida na Xunta Xeneral del Principáu d'Asturies (XXPA), na que tuvo acompañáu polos diputaos rexonales Ramón García Cañal y Alejandra Cuétara. El cabezaleru de los 'populares' asturianos señaló que nos próximos díes va mandar una carta al Gobiernu del Principáu, Vicente Álvarez Areces, al grupu Parlamentariu Socialista y al secretariu de la FSA-PSOE, Javier Fernández, cola so ufierta.

Según Ovidio Sánchez, l'actual crisis económica ta xenerando una situación ""dramática dafechu"". Asina, señaló que se fai necesario un ""esfuerzu"" de los partíos políticos, de manera que se ""llimen"" les sos diferencies p'aprobar unes cuentes que rebaxen los efeutos de l'actual situación. ""Ponémosnos a disposición del Gobiernu pa falar de los presupuestos ensin nenguna condición previa"", señaló Ovidio Sácnhez, qu'añadió que nos próximos díes el PP d'Asturies va aconceyase colos axentes sociales pa recoyer les sos inquietudes y opiniones de cara a esi diálogu colos socialistes. Pa Sánchez, lo importante nesti momentu ye adoptar midíes económiques positives p'Asturies. Entrugáu sobre si la so ufierta de diálogu pue vese condicionada coles inminentes negociaciones ente socialistes y IX, Sánchez dixo que lo primoridal nun ye quién apruebe les midíes, sinón qu'éstes seyan les correctes. ""Lo que importa ye acertar nes soluciones"", comentó."