Abiertu'l votu del públicu del II 'Sácame pola pinta'

Daniel Fernández ganó na estaya de menores imitando a Nando Agüeros, mentes que Quillo Coto fíxolo na d'adultos con una interpretación de 'Atrapado' de Stukas.

La segunda edición del 'Sácame pola pinta' tuvo llugar la selmana pasa en La Felguera, pero entovía nun finó, yá que'l votu del públicu sigue abiertu nel Facebook d'A Mansalva, organizadora del eventu. Ehí tán colgaos videos de toles actuaciones y ye posible votar por elles hasta'l día 16 al traviés de 'Préstame', permitiendo asina a los participantes llevar el Premiu del Públicu, consistente en 300 euros en conceptu de clases na Escuela de Música d’A Mansalva en cáuna de les estayes.

El ganador na categoría de menores, la orixinal del concursu, foi'l llangreanu Daniel Fernández, qu'imitó a Nando Agüeros col so 'La Santina', polo que va poder grabar un discu promocional de 4 cantares nun estudiu profesional con acompañamientu instrumental. En total tomaron parte doce neñes y neños nuna tarde que contó con un xuráu de categoría: Paula Rojo, Chus Pedro, Ramón Blanco y el propiu Agüeros.

Mentes, el vencedor de la primer edición p'adultos del 'Sácame pola pinta' foi otru llangreanu, Quillo Coto, qu'escoyó'l cantar 'Atrapado' de Stukas. Nesta ocasión el xuráu tuvo formáu por Blanco, Alfredo González, Silvia Quesada y la ganadora infantil del añu pasáu, Adriana López, qu'escoyó ente los nueve participantes a Coto como merecedor del premiu de 1.000 euros.

Na semeya, Agüeros col so imitador y ganador na estaya de menores, Fernández.