Migoya piensa que nun hai que dexar "en barbechu" la reforma estatutaria por considerances polítiques

"La Conseyera d'Alministraciones Públiques y vocera del Gobiernu, Ana Rosa Migoya, defendió güei l'aprobación de la reforma del Estatutu del Principáu, que definió como ""un retu"" que toles fuerces polítiques deben asumir ""y en nengún casu dexar en barbechu por considerances partidistes y completamente ayenes al bienestar d'Asturies"".

Migoya realizó estes manifestaciones demientres la so intervención na inauguración de les xornaes 'La distribución territorial d'España. Autonomía y Conceyos', organizaes pol Conseyu Económicu y Social del Principáu, (CES) que se celebren güei n'Uviéu.

Pa la responsable rexonal, ""la reforma del Estatutu nun ye una cuestión trivial, sinón que nél s'espeya la realidá d'una Comunidá Autónoma y les sos aspiraciones de futuru pa siguir avanzando"".

La Conseyera d'Alministraciones Públiques refirióse de la memsa manera a la negociación del modelu de financiación nel que ""el Gobiernu d'Asturies ta trabayando de manera lleal, sincera y responsable"" y espresó, poro, la sensibilidá del executivu a los plantegamientos de les Alministraciones llocales a les que definió como ""la segunda de les grandes pieces de la estructura territorial d'España"".

Precisamente, sobre l'Alministración llocal, Migoya recordó que l'Executivu autonómicu dirixóse al Gobiernu central en diferentes foros solicitando qu'ellabore una nueva llei de regulación municipal que supere la Llei de Bases de Réxime Llocal y ""desea poder tratar una norma propia pa los conceyos asturianos"". ""Güei la comunidá autónoma del Principáu espera y nagua por esa nueva regulación pa poder entamar una norma nel ámbitu autonómicu que s'axuste a les particularidaes d'Asturies"", espunxo.

Destacó, sicasí, el papel del Gobiernu asturianu en cuanto a la financiación de los conceyos al traviés de la Caxa de Creitu Llocal y facilitóse'l ""normal desarrollu de l'actividá política y institucional nos de menor capacidá económica, al traviés del Fondu Especial de Cooperación"".

Mencionó, de la mesma manera, una de les ""apuestes más ambicioses"" del Gobiernu d'Asturies en favor de la modernización teunolóxica de los conceyos asturianos al traviés del Consorciu Asturianu de Servicios Teunolóxicos. Refirióse, a lo cabero, al acuerdu algamáu cola Federación Asturiana de Conceyos en rellación al Fondu de Cooperación Llocal p'atender a los conceyos de 40.000 habitantes qu'empondera'l pesu poblacional y otra serie de variables como orografía, avieyamientu o númberu d'entidaes de población. Un sistema que calificó de ""pioneru"" n'España."