Suatea y Bloque por Asturies condenen el tratu al asturianu nel curriculum d’infantil

"El pasáu 11 de setiembre, publicóse nel BOPA, el decretu del gobiernu d'Asturies onde s'establez el currículu del segundu ciclu d'Educación Infantil. El sindicatu d'enseñanza Suatea y la formación política Bloque por Asturies denunciaron que nél nun apaez referencia nenguna a la Llingua Asturiana o Gallego-Asturiano.

Pa Suatea, esto supón ""un ataque frontal y premeditáu a los derechos educativos y llingüísticos del alumnáu y los pas asturianos, arreblagando percima del ordenamientu xurídicu d'anguaño"". El sindicatu diz que ""el que nun apaeza la Llingua Asturiana o'l Gallego-Asturiano nel currículu supón esconder, prindar, estirpar conscientemente y adré, la llingua ambiental y materna de munchos de los escolinos y patrimoniu esencial de caltenimientu y arramamientu de la nuestra cultura inmaterial"" asegurando que la midida va contra'l deprendizax significativu, l'atención a la diversidá y una contradicción ya que ""Nun tien xacíu que la nuestra llingua tea presente nel currículu d'Educación Primaria y non nel d'Educación Infantil, etapa esencial y crítica nel deprendizax llingüísticu según tolos sicollingüistes y sociólogos""

Pela so parte, Bloque por Asturies califica'l testu de ""ataque y discriminación pa daquellos padres y madres que quieren que los sos fíos y fíes deprendan la llingua asturiana dientro del sistema educativu dende los primeros años d'escolarización"" y de ""retrocesu nel reconocimientu de los drechos llingüísticos de los asturianos y asturianes y discriminación respectu del restu de ciudadanos y ciudadanes españoles"" . El Bloque acusa al Conseyeru d´Educación Riopedre d'incumplir la so promesa de l'anterior llexislatura, na que se comprometiera a que l'asturianu taría presente na Educación Infantil."