“Toi ilusionada por mostrar al mio públicu una apuesta diferente a lo que ta avezao”, asegura Marisa Valle Roso

El Teatru de la Llaboral va acoyer la presentación n’Asturies del discu nuevu de Marisa Valle Roso, ‘Consciente’, col que l’artista da un xiru a la so trayeutoria nacida na tonada. “Toi mui contenta y ilusionada por mostrar al mio públicu una apuesta diferente a lo que ta avezao, con un repertoriu propiu”, asegura la llangreana.

‘Consciente’ trátase d’un trabayu mui personal, onde la tradición asturiana ta presente amestada con xéneros como’l pop, l’indie o la música d’autor. Asina, inclúi les sos dos primeres composiciones propies, con lletres de Pablo Carrera, ‘Cómplices’ y ‘Ser como soy’, onde collabora Rozalén; otres de Víctor Manuel, Alfredo González, Paco Cifuentes; y cinco préstamos d’artistes como Violeta Parra (‘Arriba quemado el sol’), Chavela Vargas (‘Macorina’), Dulce Pontes (‘Lela’), Mercedes Sosa (‘Drume negrita’) y el propiu Víctor Manuel (‘La planta 14’).

Tres presentalu’l pasáu 15 de payares nel Teatro Lara de Madrid, Valle Roso va interpretar estos cantares per primer vegada n’Asturies mañana, nel xixonés Teatru de la Llaboral, con comienzu previstu pa les 20.30 hores. “Toi mui contenta y ilusionada por mostrar al mio públicu una apuesta diferente a lo que ta avezao, con un repertoriu propiu”, apunta la llangreana, que pa esta cita va contar con delles collaboraciones.

Asina, va tar presente Rozalén, cantante de gran ésitu “cola que coneuté mui bien dende que nos presentaron y que tien parte de culpa d’esti discu”, el so hermanu Fernando Valle Roso, la Banda Gaites Villa de Xixón “que va participar en dos o trés cantares”, y les Pandereteres de Fitoria, cola previsión d’axuntar a 70 pandereteres sobre l’escenariu. Les entraes pal conciertu tán a la venta a un preciu de 20 euros, nos palcos y anfiteatru, y de 25, nel fosu y patiu de butaques.