Ecoloxistes muestren el so refugu a la declaración d'impautu ambiental favorable pa la planta d'ESBI en Corvera

"El Colectivu Ecoloxista d'Avilés mostró güei la so ""más enérxica protesta"" pola autorización ambiental per parte del Ministeriu de Mediu Ambiente y Mediu Rural y Marín pa la planta de ciclu combináu de 800 mw en Nubléu (Corvera), promovida pola compañía pública irlandesa ESBI. Los ecoloxistes dixeron que van estudiar les midíes llegales escontra la ""arbitrariedá"" de la decisión.

D'esta manera reaicionaba'l colectivu, al traviés d'una nota prensa, a una resolución publicada güei nel Boletín Oficial del Estáu (BOE), pol que la Secretaría d'Estáu de Cambiu Climáticu, a la vista de la Propuesta de Resolución de la Direición Xeneral de Calidá y Evaluación Ambiental, de fecha 16 de setiembre del 2008, formula declaración d'impautu ambiental favorable a la realización del proyeutu 'Planta de ciclu cobináu en Corvera (Asturies)'.

Los ecoloxistes señalaron que, a la escontra de la llexislación, la empresa nun presentó asitiamientos alternativos, como exixe la llei pa la so instalación, sinón que ""impunxo"" Nubléu como única opción, una vez que ""nun la dexaron instalase nos Corrales de Buelna, en Cantabria, que yera'l llugar orixinal d'esti proyeutu"".

Añadieron que ye motivu de ""sorpresa"" que'l Ministeriu permita más instalaciones contaminantes na comarca que yá presenta ""los peores valores de calidá del aire d'España"". Los ecoloxistes dixeron que l'anterior Ministeriu refugó dellos asitiamientos en Cantabria, Andalucía y Estremadura, pola mala calidá del aire ""en poblaciones con meyores aires que los de Corvera"".

Esplicaron que la puesta en marcha d'un nuevu grupu termoeléctricu en Nubléu (Corvera) va aumentar significativamente los niveles d'emisiones na comarca y los niveles d'emisión de los principales contaminantes atmosféricos. ""Diba instalase a menos de dos kilómetros de los núcleos de Nubléu, Cancienes y los Campos, que son les poblaciones más importantes afeutaes"", dixeron.

Los ecoloxistes dixeron que la central diba dir nun área industrial yá ""mui contaminada""m al llau del complexu de DuPont, polígonu de Cancienes ""y la prevista mayor planta contaminante d'España, como ye la incineradora de Cogersa, que diba arrodiar a Nubléu y Cancienes d'instalaciones contaminantes"".

Tamién criticaron que nun tea garantizáu'l suministru d'agua, nin s'indicó l'impautu de la llinia d'alta tensión, nin se presentó la xustificación de la necesidá del proyeutu en función de la demanda d'enerxía eléctrica na zona de colocación."